សាសា យល់ព្រមដកពាក្យបណ្តឹងពី លោក សុខ ប៊ុន
សារព័ត៌មាន Cambodia News/
ភ្នំពេញ (២៧ មករា ២០១៦) ៖ នៅព្រឹកថ្ងៃអង្គារទី២៦ មករា ២០១៦ សាលាដំបូងរាជធានីភ្នំពេញ បានបើកការជំនុំជម្រះលើសំណុំរឿងលោក សុខ ប៊ុន ដែលបានប្រើហិង្សា វាយតប់លើកញ្ញា ឯក សុជាតា ហៅសាសា តែបើតាមប្រភ ពព័ត៌មានឲ្យដឹងថា នៅព្រឹកថ្ងៃអង្គារនេះ ពុំមានវត្តមានកញ្ញា សាសា និង លោក សុខ ប៊ុន នោះទេ គឺមានតែវត្តមានមេធាវីតំណាងរបស់ខ្លួនតែប៉ុណ្ណោះ។
ជាការកត់សម្គាល់ នៅក្នុងសវនាការនាព្រឹកថ្ងៃអង្គារនេះ កញ្ញា សាសា បានយល់ព្រមដកពាក្យបណ្តឹងលើលោក សុខ ប៊ុន តាំងពីថ្ងៃទី៤ ខែធ្នូ ឆ្នាំ ២០១៥ បន្ទាប់ពីមានការសម្របសម្រួល រវាងឪពុកសាសា និងលោក សុខ ប៊ុន។ ប៉ុន្តែសំណងដែលកញ្ញា សាសា ទទួលបានពីលោក សុខ ប៊ុន មិនត្រូវបានបង្ហាញឲ្យដឹងឡើយ ។
សូមបញ្ជាក់ថា កាលពីយប់ថ្ងៃទី២ ខែកក្កដា ឆ្នាំ២០១៥ លោក សុខ ប៊ុន ដែលធ្លាប់មានងារជាឧកញ្ញា បានមានជម្លោះពាក្យសំដីជាមួយ កញ្ញា សាសា រហូតឈានដល់ការប្រើហិង្សាវាយតប់កញ្ញា សាសា ឲ្យរងរបួសផងដែរ។ បន្ទាប់ពីមានករណីនេះកើតឡើងលោក សុខ ប៊ុន ក៏ព្យាយាមគេចខ្លួនប៉ុន្តែត្រូវបានសម្ដេច ហ៊ុន សែន អំពាវនាវឲ្យចូលខ្លួន ទទួលទោសតាមច្បាប់ ទើបលោក សុខ ប៊ុន មកទ ទួលទោស៕
