ការវាយប្រហារក្នុងសាកលវិទ្យាល័យនៅប៉ាគីស្ថាន អ្នកស្លាប់កើន២១នាក់
សារព័ត៌មាន Cambodia News/
ប៉ាគីស្ថាន (២១ មករា ២០១៦) ៖ ក្រុមឧទ្ទាមតាលីបង់បានបើកការវាយឆ្មក់ដោយបាញ់ប្រហារ និងបំផ្ទុះគ្រាប់បែកក្នុងបរិវេណសាកលវិទ្យាល័យ Bacha Khan ស្ថិតនៅភាគពាយព្យប្រទេសប៉ាគីស្ថានកាលពីថ្ងៃទី២០ ខែមករា ឆ្នាំ២០១៦នោះបណ្តាលឲ្យអ្នកស្លាប់កើនដល់២១នាក់ ។
កងកម្លាំងសន្តិសុខបានអះអាងថា ជនវាយប្រហារវ័យក្មេងបានលាក់ខ្លួននៅក្នុងបរិវេណជិតអគារសាកលវិទ្យាល័យ Bacha Khan ស្ថិតនៅភាគខាងជើងទីក្រុង Charsadda ប្រទេសប៉ាគីស្ថាន ហើយបានបន្លំខ្លួនចូលទៅកាន់បរិវេណសាលាយ៉ាងប៉ិនប្រសប់ និងគ្មានការចាប់អារម្មណ៍ពីកងកម្លាំងសន្តិសុខយាមកាមនៅសាលានោះ ។
ឆ្មាំយាមកាមនៅសាកលវិទ្យាល័យខាងលើនេះម្នាក់បានប្រាប់ AFP ថា ក្រុមជនវាយប្រហារទាំងនេះបានឡើងតាមជញ្ជាំងរបងសាលា ហើយធ្វើសកម្មភាពបាញ់ប្រហារតែម្តង ។
ប៉ូលិស និងទាហាន និងកងកម្លាំងពិសេសរបស់រដ្ឋាភិបាលបានទៅដល់កន្លែងកើតហេតុភ្លាមៗទាំងនៅលើដី និងទាំងនៅលើដែនអាកាស និងមិនបានបង្អង់យូរនោះឡើយ គឺធ្វើសកម្មភាពប្រហារសំដៅទៅលើក្រុមខ្មាន់កាំភ្លើងទាំងនោះតែម្តង ។ ប្រតិបត្តិការនេះបានបណ្តាលឲ្យមនុស្សយ៉ាងតិច៣០នាក់រងរបួសផងដែរ៕
