សម្តេច ហ៊ុន សែន ពិនិត្យសុខភាពប្រចាំឆ្នាំ មួយឆ្នាំម្តងនៅសឹង្ហបូរី
សារព័ត៌មាន Cambodia News/
ភ្នំពេញ (១៨ មករា ២០១៦) ៖ សម្តេចនាយករដ្ឋមន្រ្តី បានសរសេរលើ ទំព័រហ្វេសប៊ុករបស់ខ្លួនថា “ពេលនេះខ្ញុំកំពុងស្ថិតក្នុង មន្ទីរពេទ្យ នៃប្រទេសសឹង្ហបូរី ។ ពុំមានជម្ងឺអ្វីធ្ងន់ធ្ងរ ដែលត្រូវព្យាបាលនោះទេ តែនេះជាការតម្រូវ របស់គ្រូពេទ្យ ដែលកំណត់ឱ្យត្រួតពិនិត្យសុខភាព ប្រចាំឆ្នាំមួយឆ្នាំម្តង ម្យ៉ាងទៀត ការងារចុងឆ្នាំ ២០១៥ និងដើមឆ្នាំ ២០១៦ នេះពិតជាច្រើន ដែលខ្ញុំខិតខំដោះស្រាយ ទាំងយប់ទាំងថ្ងៃ រកពេលសំរាក ស្ទើរមិនបាន។
សម្តេចហ៊ុន សែនសរសេរបន្តថា៖ ការដែលខ្ញុំមកពិនិត្យសុខភាព នៅសឹង្ហបូរី មិនមានន័យថា ខ្ញុំមិនទុកចិត្តគ្រូពេទ្យ កម្ពុជាយើងនោះទេ។ ខ្ញុំពិនិត្យសុខភាពជាប្រចាំខែ ប្រចាំត្រីមាស ប្រចាំឆមាស និងព្យាបាលជម្ងឺ នៅកម្ពុជាដោយគ្រូពេទ្យខ្មែរយើង។
ដោយមានការណែនាំ របស់គ្រូពេទ្យកម្ពុជា បានស្នើរឱ្យខ្ញុំពិនិត្យ នៅក្រៅប្រទេស ដើម្បីធ្វើឱ្យប្រាកដ នូវប្រភេទជម្ងឺខ្លះ ដែលយើងខ្វះឧបករណ៍។ វេជ្ជបណ្ឌិតខ្មែរ ដែលព្យាបាលខ្ញុំ បានរួមដំណើរមកជាមួយខ្ញុំ ដើម្បីសហការ ជាមួយពេទ្យសឹង្ហបូរី ធ្វើការពិនិត្យ ដែលនេះជារឿងធម្មតា នៃកិច្ចសហការ ខាងវេជ្ជសាស្ត្រ។ ខ្ញុំនឹងវិលត្រឡប់ទៅប្រទេសវិញនៅថ្ងៃ ទី ២១ មករា ប្រសិនគ្រូពេទ្យអនុញ្ញាតិ៕
