រុន រ័ត្នវាសនា ៖ អ្នកទទួលបានបង្កាន់ដៃផាកពិន័យសូមទៅបង់ប្រាក់តាមកាលកំណត់
សារព័ត៌មាន Cambodia News/
ក្នុងកិច្ចសម្ភាសន៍ជាមួយបណ្តាញសារព័ត៌មានក្នុងស្រុក កាលពីថ្ងៃទី៥ ខែមករា ឆ្នាំ២០១៦ ឧត្ដមសេនីយ៍ឯក រុន រ័ត្នវាសនា ប្រធាននាយកដ្ឋានសណ្ដាប់ធ្នាប់ នៃអគ្គស្នងការនគរបាលជាតិ បានអោយដឹងថា បងប្អូនប្រជាពលរដ្ឋ ដែលទទួលបាន បង្កាន់ដៃ ផាកពិន័យហើយ សូមរួសរាន់ ទៅបង់ប្រាក់ពិន័យតាមកាល កំណត់។
ឧត្ដមសេនីយ៍ឯក រុន រ័ត្នវាសនា បានបន្តថា ចំពោះបងប្អូនប្រជាពលរដ្ឋ ដែលទទួលបាន បង្កាន់ដៃ ផាកពិន័យហើយមិនរួសរាន់ទៅបង់ប្រាក់ពិន័យតាមកាល កំណត់ ប្រសិនបើលើស ៣០ថ្ងៃ ប្រាក់ពិន័យនឹងឡើងគុណ ២ដង និង ៦០ថ្ងៃ ប្រាក់ពិន័យគុណ ៣ដង តែបើលើស ៩០ ថ្ងៃ នោះនឹងត្រូវប្រឈមមុខនឹងតុលាការ ផ្តន្ទាទោសទៅតាមច្បាប់ជាក់ជាមិនខាន។
នៅក្នុងនោះដែរ ឧត្ដមសេនីយ៍ឯក រុន រ័ត្នវាសនា បានបញ្ជាក់ថា ការផាកពិន័យនេះ មិនមែន ដើម្បីរកប្រាក់ ចំណេញនោះទេ គឺធ្វើយ៉ាងណាដើម្បីអោយ បងប្អូនប្រជាពលរដ្ឋ គោរពច្បាប់តែប៉ុណ្ណោះ ហើយបើប្រៀបធៀបជាមួយប្រទេសជិតខាង ការផាកពិន័យនេះ គឺស្មើរនឹង ៥០% នៃប្រទេសគេប៉ុណ្ណោះ៕