ចំនួន ៥ថ្ងៃប្រាក់ផាកពិន័យពីការល្មើសច្បាប់ចរាចរណ៍ បានជាង៣០០លានរៀល
សារព័ត៌មាន Cambodia News/
ភ្នំពេញ (០៦ មករា ២០១៦) ៖ រយៈពេល៥ថ្ងៃគិតចាប់ពីថ្ងៃទី១ ខែមករា ដល់ថ្ងៃទី៥ ខែមករានគរបាលចរាចណ៍បាន ចុះពិនិត្យរថយន្តបានសរុបប្រមាណជាង១១ម៉ឺនគ្រឿង ដោយក្នុងនោះពិន័យបានយាន្តយន្តគ្រប់ប្រភេទចំនួនជាង៣ម៉ឺនគ្រឿង អប់រំបានចំនួនជាង១៨០០០គ្រឿង ឃាត់បានយានយន្តគ្មានស្លាកលេខបាន ចំនួន៥៩៥គ្រឿងនិងពិន័យជាប្រាក់បានប្រមាណជាង៣០០លានរៀល។
នេះបើតាមការឲ្យដឹងពីលោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាន នគរបាលចរាចរណ៍ និង សណ្តាប់ធ្នាប់ ស្តីពីលទ្ធផលប្រតិបត្តិការអនុវត្តច្បាប់ចរាចរណ៍ផ្លូវគោក ក្នុងកិច្ចសម្ភាសន៍ជាមួយបណ្តាញសារព័ត៌មានក្នុងស្រុក កាលពីថ្ងៃទី៥ ខែមករា ឆ្នាំ២០១៦ ។
លោករុន រ័ត្នវាសនាបានបង្ហាញថា ប្រជាពលរដ្ឋមួយចំនួនមិនបានពាក់មួកសុវត្ថិភាព ជាពិសេសអ្នកជិះខាងក្រោយ។លោកឧត្តមសេនីយ៍ឯក រុន រ័ត្នវាសនា បានថ្លែងថា ការត្រួតពិនិត្យ និងផាកពិន័យនេះ គឺដើម្បីឲ្យមានការគោរពច្បាប់តែប៉ុណ្ណោះ បើសិនប្រៀបធៀបទៅប្រទេសជិតខាង ការផាកពិន័យនេះបានតែ ៥០ភាគរយទេ។
គួរបញ្ជាក់ថាច្បាប់ចរាចរណ៍ ផ្លូវគោកថ្មីចំនួន ១២ជំពូក និង ៩២មាត្រាដែលមានក្រឹត្យក្រម តឹងរឹងជាង ច្បាប់ចាស់ នោះ ត្រូវបានរដ្ឋសភា អនុម័តនាព្រឹកថ្ងៃទី០៥ ខែធ្នូ ឆ្នាំ២០១៤នេះ ដោយសំលេង ឯកច្ឆន្ទ ១០៣ លើ១០៣ សំលេង។ជាលទ្ធផលច្បាប់នេះបានចូលជាធរមាន និងអនុវត្ត ចាប់តាំងពីថ្ងៃទី១ ខែមករា៕