សម្តេច ហ៊ុន សែន ថាកម្ពុជាត្រូវតែប្រុងប្រយ័ត្ននឹងក្រុមISIS
សារព័ត៌មាន Cambodia News/
ភ្នំពេញ (១០ ធ្នូ ២០១៥) ៖ ក្នុងកិច្ចប្រជុំប្រជុំសភាតំបន់អាស៊ី(APA)ដែលធ្វើឡើងនៅរាជធានីភ្នំពេញនៅថ្ងៃពុធនេះ សម្តេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានថ្លែងថា ការវាយប្រហាររបស់ក្រុមISISបានរាលដាលមកដល់អឺរ៉ុបនិងសហរដ្ឋអាមេរិកនិងតំបន់ផ្សេងៗដោយមិនរើសមុខនោះទេ ដូច្នេះកម្ពុជាត្រូវតែប្រុងប្រយ័ត្ននឹងក្រុមភេរវករអាយស៊ីស(ISIS)ដោយសម្តេចថា បើទោះកម្ពុជាមិនស្ថិតក្នុងគោលដៅនៃការវាយប្រហារក៏ដោយ។
កាលពីថ្ងៃទី២១ខែវិច្ឆិកា ឆ្នាំ២០១៥ ក្នុងកិច្ចប្រជុំកំពូលអាស៊ានសហរដ្ឋអាមេរិកនៅប្រទេសម៉ាឡេស៊ី សម្តេច ហ៊ុន សែន បានថ្លែងថាលោកគាំទ្រការប្រយុទ្ធប្រឆាំងនឹងក្រុមអាយស៊ីស(ISIS) ដោយលោកថាការវាយបំបាក់ក្រុមប្រឆាំងនឹងភេរវកម្មអន្តរជាតិនិងក្រុមជ្រុលនិយមនេះ ត្រូវការដាក់ចេញនូវ”យន្តការរឹងមាំ ម៉ឹងម៉ាត់និងប្រទាក់ក្រឡាគ្នា”។
សកម្មភាពនៃការវាយបំបាក់ISISធ្វើឡើងបន្ទាប់ពីទីក្រុងប៉ារីសប្រទេសបារាំងរងការវាយប្រហារយ៉ាងធ្ងន់ធ្ងរកាលពីកន្លងទៅ ដោយសម្លាប់មនុស្សជាង១៣០នាក់និងរងរបួស២០០នាក់។ អំពើឃោរឃៅនេះត្រូវបានពួកសកម្មប្រយុទ្ធរដ្ឋអ៊ីស្លាមISIS ប្រកាសថាជាស្នាដៃរបស់ពួកគេ៕
