ក្រសួងអប់រំបដិសេធថា គ្មានការលួចធ្វើសញ្ញាបត្រក្លែងក្លាយថ្នូរនឹងទឹកប្រាក់ ៦៥០ដុល្លារ
សារព័ត៌មាន Cambodia News/
ភ្នំពេញ (០៧ ធ្នូ ២០១៥) ៖ យោងតាម សេចក្ដីប្រកាស របស់ក្រសួងអប់រំ យុវជន និងកីឡា ចុះថ្ងៃទី៦ ខែធ្នូ ឆ្នាំ២០១៥ បានឲ្យដឹងថា ក្រសួងអប់រំ យុវជន និងកីឡា បានប្រកាសថា គ្មានករណីមន្ត្រីមន្ទីរអប់រំ ខេត្តបាត់ដំបង លួចធ្វើលិខិតបញ្ជាក់ ការសិក្សា ឲ្យសិស្សធ្លាក់បាក់ឌុប ជាថ្នូរនឹងលុយ ៦៥០ដុល្លារ ដូចសារព័ត៌មានមួយចំនួន បានចុះផ្សាយនោះទេ។
ការប្រកាសបដិសេធនេះ បានធ្វើឡើងបន្ទាប់ពី ក្រសួងអប់រំ យុវជន និងកីឡា បានសម្រេចបង្កើត គណៈកម្មការកោសល្យវិច័យ ដើម្បីពិនិត្យ និងស្រាវជ្រាវ លើភាពមិនប្រក្រតី ដែលសារព័ត៌មាន មួយចំនួន បានផ្សព្វផ្សាយថា មានមន្ត្រីមន្ទីរ អប់រំខេត្ត បាត់ដំបង លួចធ្វើលិខិតបញ្ជាក់ ការសិក្សាឲ្យ សិស្សធ្លាក់បាក់ឌុបជាថ្នូរ នឹងលុយ៦៥០ដុល្លារ។
ក្រសួងអប់រំ បានបញ្ជាក់ថា ករណីខាងលើនេះ មិនមែនជាការទទួលប្រាក់ ដែលមន្ត្រីនៃមន្ទីរអប់រំ យុវជន និងកីឡា ខេត្តបាត់ដំបង បានប្រព្រឹត្តជាថ្នូរ នឹងការក្លែងបន្លំ វិញ្ញាបនប័ត្របណ្ដោះ អាសន្នមធ្យមសិក្សាទុតិយភូមិ ដូចការចុះក្នុងសារព័ត៌មាននោះឡើយ។
តែយ៉ាងណាក៏ដោយ ក្រសួងអប់រំ នឹងនៅតែពិនិត្យតាមដាន និងស្រាវជ្រាវការងារនេះ បន្តទៀត ព្រោះក្រសួងអប់រំចាត់ទុក ករណីនេះ អាចជាការធ្វើសញ្ញាបត្រក្លែងក្លាយ ដើម្បីទម្លាក់កំហុស ទៅលើនរណាម្នាក់ ឬជាចេតនាអាក្រក់ ក្នុងការបង្ខូចឈ្មោះស្ថាប័ន៕
