៥ ទៅ ៦ថ្ងៃទៀតទឹកទន្លេនឹងអាចឡើងលិចដំណាំពលរដ្ឋ
Cambodia News/
ភ្នំពេញ៖ នៅថ្ងៃទី២២ ខែកក្កដានេះ ក្រសួងធនធានទឹក និងឧតុនិយម បានចេញនូវសេចក្ដីជូនដំណឹងមួយឲ្យដឹងថានៅរយៈពេល ប្រាំទៅប្រាំមួយថ្ងៃខាងមុខទៀត ស្ថានភាពទឹកទន្លេក្នុងប្រទេសកម្ពុជា នឹងមានការកើនឡើងហូរចូលតាមបណ្ដាព្រែក និងស្ទឹងមួយចំនួន នៅតាមដំបន់វាលទំនាបអមសងខាងទន្លេ ដែលអាចនឹងបង្កផលប៉ះពាល់ដល់ដំណាំកសិផលរបស់ប្រជាលរដ្ឋនៅតាមដំបន់ ទាំងនោះ។
ក្រសួងធនធានទឹកបញ្ជាក់ថា ការកើនឡើងនូវទឹកទន្លេមេគង្គនាពេលខាងមុខនេះ បណ្ដាមកពីឥទ្ធិពលរបស់ប្រព័ន្ធសម្ពាធទាប (ITCZ) ដែលបានបង្ករឲ្យមានភ្លៀធ្លាក់យ៉ាងច្រើន នៅតំបន់អាងទន្លេមេគង្គ ក្នុងប្រទេសថៃ និងប្រទេសឡាវ ហើយថា ស្ថានភាពបែបនេះនឹងបង្កឲ្យទឹកទន្លេមេគង្គ ទន្លេសាប ទន្លេបាសាក់ និងបឹងទន្លេសាប ត្រូវកើនឡើងជាបន្តបន្ទាប់ ពិសេសក្នុងរយៈពេលពី ប្រាំ ទៅ ប្រាំមួយ ថ្ងៃខាងមុខនេះ។
ជាមួយគ្នានេះដែរក្រសួងធនធានទឹកក៏បាន អំពាវផងដែរ ដល់អាជ្ញាធរ និង ប្រជាពលរដ្ឋ ដែល រស់នៅតាមបណ្ដាយដងទន្លេមេគង្គ ទន្លេសាប ទន្លេបាសាក់ និងបឹងទន្លេសាប ត្រូវរួសរាន់ប្រមូលផលឲ្យបានទាន់ពេលវេលា និងត្រូវបង្កើនការយកចិត្តទុកដាក់ប្រុងប្រយ័ត្នខ្ពស់ ចំពោះស្ថានភាពទឹកជំនន់ខាងលើនេះ ដើម្បីចៀសសវាងនូវរាល់គ្រោះថ្នាក់ផ្សេងៗដែលអាចកើតឡើងជាយថាហេតុនោះ៕