សមត្ថកិច្ចថា ពិបាកប្រមូលភស្តុតាងតាមហ្វេសប៊ុក ករណីវាយតំណាងរាស្រ្តបក្សប្រឆាំង
សារព័ត៌មាន Cambodia News/
ភ្នំពេញ (០៣ វិច្ចិការ ២០១៥) ៖ អ្នកនាំពាក្យអគ្គស្នងការរងនគរបាលជាតិ បានអះអាងថា ការបង្ហោះឯកសារតាមបណ្តាញសង្គម នាំឲ្យជនដៃដល់ងាយស្រួលរត់គេចខ្លួន ហើយចាត់ទុកឯកសារទាំងនោះសមត្ថកិច្ចពិបាកនឹងប្រមូលយកនិងមិនផ្លូវការ។
បើតាមគេហទំព័ររបស់អគ្គស្នងការដ្ឋាននគរបាលជាតិ បានឲ្យដឹងថា សមត្ថកិច្ចកំពុងតែសកម្មក្នុងការប្រមូល រូបភាពនិងឯកសារនានា ដែលអាចជាភស្តុតាងក្នុងការកំណត់អត្តសញ្ញាណជនសង្ស័យដែលបានវាយដំអ្នកតំណាងរាស្រ្តគណបក្សសង្រ្គោះជាតិពីររូបកាលពីថ្ងៃទី២៦ ខែតុលា។
លោក គៀត ច័ន្ទថារិទ្ធ អ្នកនាំពក្យអគ្គស្នងការរងនគរបាលជាតិ បានឲ្យដឹងថា សមត្ថកិច្ចបានបំពេញនីតិវិធីរួចហើយជាមួយតុលាការ ដើម្បីបើកការស៊ើបអង្កេតនិងបានចុះពិនិត្យកន្លែងកើតហេតុរួចរាល់ ហើយសមត្ថកិច្ចក៏បានទទួលនូវ រូបភាព ក៏ដូចជាឯកសារនានាមួយចំនួនផងដែរ។ លោកបានបន្ថែមថាដំណើរការសាកសួរសាក្សី ដូចជាអ្នកបើបរ និងអ្នកនៅជិត និងបានឃើញហេតុការណ៍ផ្ទាល់កំពុងតែបន្តនីតិវិធី។
គួរបញ្ជាក់ថា នៅព្រឹកថ្ងៃទី២៦ខែតុលា បាតុកររាប់ពាន់នាក់បានប្រមូលផ្តុំគ្នានិងតវ៉ានៅមុខវិមានរដ្ឋសភា ដើម្បីឲ្យដកតំណែង លោក កឹម សុខា ដោយពួកគាត់ចោទប្រកាន់ថាលោក កឹម សុខា ជា”មនុស្សបោកប្រាស់ ក្រឡេចក្រឡុចនិងជាអ្នកដែលនាំទុក្ខដល់ប្រជាពលរដ្ឋ”៕
