មន្ត្រីបក្សកាន់អំណាចស្នើឲ្យតាមចាប់ជនបង្កហិង្សាមកផ្តន្ទាទោសតាមផ្លូវច្បាប់
សារព័ត៌មាន Cambodia News
ភ្នំពេញ (២៧ តុលា ២០១៥) ៖ ក្រោយពីមានបាតុកម្មទ ដែលឈានដល់ការប្រើអំពើហិង្សាយ៉ាងធ្ងន់ធ្ងរ មកលើតំណាងរាស្ត្រ គណបក្សសង្គ្រោះជាតិ កាលពីព្រឹកថ្ងៃទី២៦តុលា ម្សិលមិញ តំណាងរាស្ត្រគណបក្សប្រជាជនកម្ពុជា លោកហ៊ុន ម៉ានី រួមនឹងអង្គការសមាគមជាច្រើនទៀត បានថ្កោលទោសនឹងអំពើហិង្សាដ៏ឃោរឃៅ និងបានស្នើឲ្យអាជ្ញាធរមានសមត្ថកិច្ច តាមរកចាប់ខ្លួនជនប្រព្រឹត្ត មកផ្តន្ទាទោសតាមផ្លូវច្បាប់ផងដែរ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានបញ្ជាក់ថា ការប៉ះទង្គិចគ្នារវាង បាតុករ និងតំណាងរាស្ត្រគណបក្សសង្គ្រោះជាតិ គឺលោកគង់ សភា និងលោកញ៉យ ចំរើន ជាទង្វើខុសឆ្គង និងជាគំរូមិនល្អ ដល់ប្រជាពលរដ្ឋ ហើយក៏ជាទង្វើខុសច្បាប់ផងដែរ។
អ្នកនាំពាក្យគណបក្សប្រជាជនរូបនេះ បានបន្តថា គោលបំណងដែលក្រុមបាតុករ លើកគ្នាមកតវ៉ានៅពេលនេះ គឺដើម្បីទាមទារឲ្យលោកកឹម សុខាអនុប្រធានទី១នៃរដ្ឋសភាចុះចេញពីតំណែង ដោយសារមានភាពថ្នាំងថ្នាក់នឹងសកម្មភាពមួយចំនួន របស់អនុប្រធានទី១រដ្ឋសភារូបនេះ។
សូមបញ្ជាក់ថា កាលពីថ្ងៃទី២៦ ខែតុលា ប្រជាពលរដ្ឋជាច្រើននាក់ បាននាំគ្នាតវ៉ា និងស្នើសុំឲ្យលោកហេង សំរិន ប្រធានរដ្ឋសភា និងតំណាងរាស្ត្រទាំងអស់ ដកលោក កឹម សុខា ចេញពីមុខតំណែងជាអនុប្រធានទី១ នៃរដ្ឋសភា។
ការស្នើសុំនេះ ក្រោមហេតុផលថា លោក កឹម សុខា បានធ្វើសកម្មភាពឃោសនា បោកប្រាស់ញុះញង់ បំបែកបំបាក់ បង្កអស្ថិរភាព ព្រមទាំងធ្វើការអុកឡុក បង្កឲ្យមានកំហឹងពូជសាសន៍ និងអាចឈានបង្កឲ្យមានការសង្គ្រាម កើតមានក្នុងផ្ទៃប្រទេស៕