ចៅក្រមតុលាការកំពូលប្រទេសថៃ ពិនិត្យរឿងអាស្រូវរបស់លោកស្រីយីងឡាក់
សារព័ត៌មាន Cambodia News/
ថៃ (១៩ មីនា ២០១៥) ៖ តុលាការកំពូលប្រទេសថៃ នឹងធ្វើសេចក្ដីសម្រេចដ៏កម្រមួយនៅថ្ងៃនេះ ថាតើត្រូវទទួលយកពាក្យបណ្ដឹងរបស់គណៈកម្មការប្រឆាំងអំពើពុករលួយ ដែលប្ដឹងអតីតនាយករដ្ឋមន្ត្រីលោកស្រីយីងឡាក់ ករណីបង្កខាតបង់ប្រាក់ជិត៦០០ពាន់លានបាតក្នុងគម្រោងទិញស្រូវ ។
ប្រធាននាយកដ្ឋាននយោបាយ និងព្រហ្មទណ្ឌតុលាការកំពូល លោក Thanarerk Nitiseranee និយាយថា កិច្ចប្រជុំនេះធ្វើឡើងដោយចៅក្រមចំនួន៩រូប ហើយនឹងធ្វើសេចក្ដីសម្រេចរួមគ្នា ថាតើត្រូវទទួលយករឿងនេះ ករណីរបស់លោកស្រី យីងឡាក់ មកពិនិត្យនិងបើកជំនុំជម្រះដែរឬទេ គឺនៅថ្ងៃនេះនឹងប្រកាសឲ្យដឹង ។
មេធាវីរបស់លោកស្រីយីងឡាក់ គឺលោក Norawit Lalang និយាយថាលោកស្រីយីងឡាក់ មិនមានវត្តមាននៅតុលាការនោះទេ តែលោកថាកូនក្ដីរបស់លោកមិនមានកំហុសឡើយ ។
នៅក្នុងសំណុំរឿងនេះ គឺមានអគ្គព្រះរាជអាជ្ញាតុលាការកំពូលចំនួន៦រូប ត្រូវបានកោះហៅមកការពាររឿងក្ដីនេះ ។ តាមក្រមព្រហ្មទណ្ឌ មាត្រា១៥៧ និងច្បាប់ប្រឆាំងអំពើពុករលួយប្រទេសថៃ ប្រសិនបើរកកំហុសឃើញគឺលោកស្រីយីងឡាក់ នឹងមានទោស១០ឆ្នាំ ។
អ្នកវិភាគបានហៅចំណាត់ការប្រឆាំងលោកស្រីយីងឡាក់ គឺការវាយសំពងដ៏ខ្លាំងមួយទៅលើអ្នកនយោបាយក្រុមអតីតនាយករដ្ឋមន្ត្រីថាក់ស៊ីន ស៊ីណាវ៉ាត់ត្រា ហើយជាចេតនាឃាឃាំងលោកស្រីយីងឡាក់មិនឲ្យមានឱកាសធ្វើនយោបាយ នៅក្នុងការបោះឆ្នោតសភាដើមឆ្នាំ២០១៦ ៕
