ស្រ្តីមានកូននិងមានគភ៌ នៅក្នុងពន្ធនាគារព្រៃស ត្រូវបានដោះលែង
សារព័ត៌មាន Cambodia News/
ភ្នំពេញ (០៩ មិនា ២០១៥) ៖ កាលពីថ្ងៃថ្ងៃអាទិត្យម្សិលមិញ លោក គឹម សន្តិភាព អនុរដ្ឋលេខាធិការក្រសួងយុត្តិធម៌ ក្នុងនាមតំណាង លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ រួមនឹងតំណាងក្រសួងកិច្ចការនារី បានដឹកនាំមន្រ្តីពាក់ព័ន្ធ ចុះរៀបចំពិធីដោះលែងស្រ្តីមានកូន និងមានគភ៌ ចំនួន៧រូប ចេញពីពន្ធនាគារព្រៃសសម្រាប់រាជធានីភ្នំពេញ។
កម្មវិធីនេះបានធ្វើឡើង បន្ទាប់ពីរាជរដ្ឋាភិបាលកម្ពុជា ប្រកាសដោះលែងស្រ្តីមានកូន និងមានគភ៌ ពីពន្ធនាគារនៅទូទាំងប្រទេស ឱ្យអស់មុនបុណ្យចូលឆ្នាំថ្មី ប្រពៃណីជាតិខ្មែរ ខាងមុខនេះ ។
ក្នុងពិធីដោះលែងនេះ ក៏មានផ្តល់វត្ថុអនុស្សាវរីយ៍ និងថវិកា ១៥ម៉ឺនរៀល សម្រាប់ស្រ្តីមានកូន និងស្រ្តីមានគភ៌ ដែលត្រូវដោះលែងទាំងនោះផងដែរ ។
សូមជំរាបថា ក្នុងទិវាសិទ្ធិនារីអន្តរជាតិ ៨មីនានេះ រដ្ឋាភិបាលបានសម្រេចដោះលែង ស្រ្តីមានកូន និង ស្រ្តីមានគភ៌ នៅក្នុងពន្ធនាគារ សរុបចំនួន២២នាក់ នៅទូទាំងប្រទេសកម្ពុជា៕
