កម្ពុជានាំចេញអង្ករ បានជាង ៣៨ម៉ឺនតោន នៅឆ្នាំ២០១៤
សារព័ត៌មាន Cambodia News
អត្ថបទ៖ ហេង នាង
ភ្នំពេញ (០៦ មករា ២០១៥) ៖ នៅពេញ១ឆ្នាំ ឆ្នាំ២០១៤ ដែលទើប កន្លងទៅថ្មីៗនេះ ប្រទេសកម្ពុជា បាននាំចេញអង្ករ ទៅកាន់ទីផ្សារ អន្តរជាតិបានចំនួន ៣៨៨,០៦១ តោន កើនឡើង ២.២ភាគរយបើធៀប នឹងឆ្នាំ២០១៣ ដែលនាំចេញ បានចំនួន ៣៧៨,៨៥៦តោន នេះបើយោងតាម របាយការណ៍ ស្តីពីស្ថានភាព នៃការនាំចេញអង្ករកម្ពុជា ប្រចាំឆ្នាំ២០១៤ របស់លេខាធិការដ្ឋាន ច្រកចេញចូលតែមួយ សម្រាប់បំពេញ បែបបទនាំចេញអង្ករ។
របាយការណ៍ដដែលបានដឹងទៀតថា សហភាពអឺរ៉ុប នៅតែជាប្រទេស ដែលនាំចេញអង្ករកម្ពុជា ច្រើនជាគេ ក្នុងនោះប្រទេសបារាំង ឈរលំដាប់លេខ១ មានចំនួន ៧០០៧៧តោន, ទី២ប្រទេស ប៉ូឡូញ ចំនួន ៥៥៩៣៨ តោន និងទី៣ ប្រទេសហូឡង់ ចំនួន ៣២០៤ តោន ។
ចំណែកតំបន់អាស៊ាន ប្រទេសដែលនាំចូលអង្ករ ពីកម្ពុជា បានច្រើនជាងគេ គឺ ម៉ាឡេស៊ី ចំនួន ៤៨ ១២០ តោន ទី២ ប្រទេសប្រុយណេ ៣៥០៧ តោន និងទី៣ ប្រទេស សឹង្ហបុរី ៣២៣៩តោន រីឯប្រទេសចិន ក៏ជាគោលដៅថ្មី របស់អង្ករកម្ពុជា ផងដែរ ដោយប្រទេសនេះ បាននាំចូលអង្ករចំនួន ៤៨៩៨០ តោន ។
សូមជម្រាបថា រហូតមកដល់ពេលនេះ ក្រុមហ៊ុន ដែលបាននាំអង្ករ ចេញមានចំនួន ៨៦ក្រុមហ៊ុន ហើយក្រុមហ៊ុននាំចេញ អង្កររបស់កម្ពុជា ដែលនាំចេញ បានច្រើនជាងគេ គឺចំណាត់លេខ១ បានធ្លាក់ទៅលើ ក្រុមហ៊ុន Khmer Food របស់លោកឧកញ៉ា គឹម សាវុធ ដែលនាចេញបាន ៤៥៧៦៦តោន ស្មើនឹង ១១.៨២ភាគរយ នៃការនាំចេញសរុប, លេខ២ ក្រុមហ៊ុន Amru Rice របស់លោក សុង សារ៉ន ដែលនាចេញ បានចំនួន ៤៣០៦៤ តោន ស្មើនឹង១១.១៣ ភាគរយ នៃការនាំចេញសរុប និង លេខ ក្រុមហ៊ុន Baitang (Kampuchea) ចំនួន ២៨,៧១៤ តោនស្មើនឹង ៧.៤២ភាគរយ ៕
