សម្តេច ហ៊ុន សែន ប្រជាជនកម្ពុជាម្នាក់ មានចំណូលជាមធ្យម ១២២៥ ដុល្លារ នៅឆ្នាំ២០១៥
សារព័ត៌មាន Cambodia News/
ភ្នំពេញ (១៦ តុលា ២០១៥ ) ៖ ក្នុងកិច្ចប្រជុំវេទិកាស្តីពីការកាត់បន្ថយភាពក្រីក្រសកល និងការអភិវឌ្ឍឆ្នាំ២០១៥ ក្រោមប្រធានបទ “ការអភិវឌ្ឍរួមតាមរយៈកិច្ចខិតខំប្រឹងប្រែងរួមគ្នា លុបបំបាត់ភាពក្រីក្រ” នៅទីក្រុងប៉េកាំង ប្រទេសចិន នាព្រឹកថ្ងៃទី១៦តុលានេះ សម្តេចតេជោ ហ៊ុនសែន បានលើកឡើងថា ផលិតផលក្នុងស្រុកសរុបសម្រាប់ប្រជាជនកម្ពុជាម្នាក់ បានកើនឡើងគួរជាទីមោទនៈ ពី ២៥៣ដុល្លារអាមេរិក ដល់ ១២២៥ ដុល្លារអាមេរិក នៅឆ្នាំ២០១៥។
ចំពោះមុខប្រធានាធិបតីចិន ស៊ី ជិនពីង សម្តេចហ៊ុនសែន បានលើកឡើងថា ការកាត់បន្ថយអត្រានៃភាពក្រីក្រមកត្រឹម ១៣,៥% នៅឆ្នាំ២០១៤ ធ្វើឲ្យកម្ពុជា ទទួលបានចំណាត់ថ្នាក់ជាប្រទេសជោគជ័យបំផុតទី៤ លើពិភពលោក ក្នុងការកាត់បន្ថយភាពក្រីក្រ ដោយសម្រេចបានគោលដៅអភិវឌ្ឍន៍សហស្សវត្សរ៍ ក្នុងការកាត់បន្ថយអត្រាភាពក្រីក្រ មុនកាលបរិច្ឆេទ កំណត់នាចុងឆ្នាំ២០១៥ ទន្ទឹមនឹងការសម្រេចបានគោលដៅចំនួនបួនទៀត ដូចជា ការកាត់បន្ថយអត្រាមរណភាពរបស់កុមារ និងការលើកកម្ពស់សុខភាពមាតា ជាដើម។
សម្តេចហ៊ុនសែន បានគូសបញ្ជាក់ថា “លទ្ធផលដែលកម្ពុជាទទួលបានខាងលើនេះ ពិតជាមិនអាចកាត់ផ្តាច់បានពីការជួយជ្រោមជ្រែងដ៏សប្បុរស ពីសំណាក់ដៃគូអភិវឌ្ឍន៍ទាំងឡាយនោះឡើយ ពិសេសមិត្តចិន ដែលបានជួយយ៉ាងច្រើនដល់កម្ពុជា ក្នុងការវិនិយោគ ទាំងលើហេដ្ឋារចនាសម្ព័ន្ធរូបវន្ត ទាំងលើការកសាងសមត្ថភាពស្ថាប័ន និងធនធានមនុស្ស៕
