ប្អូនស្រីពៅលោក គីម ជុងអ៊ុន ត្រូវបានតែងតាំងជាកម្មាភិបាលជាន់ខ្ពស់របស់បក្សពលករ
សារព័ត៌មានយុវវ័យថ្មី/
អន្តរជាតិ (២៨ វិច្ចិកា ២០១៤) ៖ លោកស្រី Kim Yo-jong ដែលជាប្អូនស្រីពៅរបស់បុរសខ្លាំង គីម ជុងអ៊ុន នៃរបបផ្ដាច់ការក្រុងព្យុងយ៉ាង ត្រូវបាន បក្សពលករតែងតាំងជាកម្មាភិបាលជាន់ខ្ពស់របស់បក្ស ដែលជាការប្រកាសបើកចំហលើកដំបូង ខណៈមេដឹកនាំវ័យក្មេងគីម ជុងអ៊ុន មានបញ្ហាសុខភាព ។
ទីភ្នាក់ងារសារព័ត៌មានមជ្ឈឹមកូរ៉េ KCNA រាយការណ៍ថា លោកស្រី Kim Yo-jong ត្រូវបានតែងតាំង ជាអនុប្រធាន គណៈកម្មាធិការមជ្ឈឹមបក្ស ។ គណៈកម្មាធិការនេះមានឥទិ្ធពល និងមានតួនាទី ក្នុងការធ្វើសេចក្ដីសម្រេច លើកិច្ចការសំខាន់ៗរបស់បក្សពលករ ដោយរួមមានទាំងការដកហូតតំណែងឬដាក់ពិន័យលើកម្មាភិបាលណាដែលប្រព្រឹត្តកំហុស ។
អ្នកសង្កេតការណ៍ហៅការតែងលោកស្រី Kim Yo-jong នៅពេលនេះ គឺមិនមែនជារឿងអាថ៌កំបាំង អ្វី ច្រើនទេ ព្រោះ លោកស្រីបានចេញមុខ ក្នុងកម្មវិធីជាសាធារណៈធំៗ របស់បក្សពលករ នៅពេលលោកគីម ជុងអ៊ុន បាត់មុខជាសាធារណៈ កាលពីចុងខែកញ្ញា ហើយសង្ស័យថាត្រូវបានផ្ដួលរំលំ ។ តែនៅពេលនោះលោកស្រី Kim Yo-jong មានការសង្ស័យថាត្រូវបានបក្សពលករតែងតាំងជំនួសបងប្រុសរបស់នាង ៕
