សមត្ថកិច្ចបិទផ្លូវម្តុំស្ថានទូតអូស្ត្រាលីរារាំងការតវ៉ាប្រឆាំងនឹងកិច្ចព្រមព្រៀងទទួលជនភៀសខ្លួន
សារព័ត៌មាន Cambodia News/
ភ្នំពេញ (២៦ កញ្ញា ២០១៤) ៖ កម្លាំងសមត្ថកិច្ចរាប់សិបនាក់ នៅព្រឹកថ្ងៃសុក្រនេះបិទផ្លូវចេញចូលទាំងអស់នៅម្តុំរដ្ឋសភាជាតិ ក្រសួងការបរទេស និងស្ថានទូតអូស្ត្រាលី ដើម្បីរារាំងការតវ៉ារបស់ប្រជាពលរដ្ឋមានជម្លោះដីធ្លីប្រឆាំងនឹងកិច្ចព្រមព្រៀងរវាងរដ្ឋាភិបាលកម្ពុជា និងអូស្ត្រាលី ក្នុងការទទួលយកជនភៀសខ្លួនមកពីអូស្ត្រាលី។
រដ្ឋាភិបាលកម្ពុជា និងអូស្ត្រាលីសម្រេចចុងក្រោយក្នុងការចុះហត្ថលេខាលើអនុស្សរណៈទទួលយកជនភៀសខ្លួនពីប្រទេសអូស្ត្រាលីមកតាំងទីលំនៅក្នុងប្រទេសកម្ពុជា នៅថ្ងៃទី២៦ ខែកញ្ញា ឆ្នាំ២០១៤ វេលាម៉ោង៣រសៀលនៅទីស្តីការក្រសួងមហាផ្ទៃ។
តាមគម្រោងអ្នករងគ្រោះដីធ្លី និស្សិតបញ្ញវន្ត និងបណ្តាញព្រះសង្ឃឯករាជ្យ នៅព្រឹកនេះនឹងតវ៉ានៅមុខស្ថានទូតអូស្ត្រាលី រដ្ឋសភា និងក្រសួងមហាផ្ទៃ ឲ្យបញ្ឈប់ជាបន្ទាន់នូវកិច្ចព្រមព្រៀងបញ្ជូនជនភៀសខ្លួនអូស្រា្តលីមកកម្ពុជា ដោយសំអាងថា កម្ពុជាត្រូវដោះស្រាយជម្លោះដីធ្លីក្នុងប្រទេសជាមុនសិន៕
