សង្គមស៊ីវិលបារម្ភចំពោះការរស់នៅរបស់កុមារតាមម្តាយក្នុងពន្ធាគារ ខេត្តព្រះសីហនុ
ក្រុមអង្គការសង្គមស៊ីវិលជាច្រើន ប្រចាំការ បានសម្តែងការព្រួយបារម្ភ ចំពោះជីវភាព និងការរស់នៅរបស់អ្នកទោសដែលមានអាយុក្រោម ១៨ឆ្នាំ និងកុមារា កុមារីមួយចំនួន បានតាមម្តាយ មករស់នៅក្នុងពន្ធនាគារ ព្រមទាំងស្រី្តមានផ្ទៃពោះ កំពុងជាប់ពន្ធនាគារមួយចំនួនផងដែរកំពុងជាប់ក្នុងពន្ធនាគារខេត្ត ក្នុងខេត្តព្រះសីហនុ សព្វថ្ងៃ។
មូលហេតុ ដែលពួកគេ បានប្រព្រឹត្តខុសឆ្គងក្នុងសង្គម គឺបង្កឡើងដោយខ្វះការអប់រំ ក្នុងសង្គមគ្រួសារ និងខ្វះការអប់រំ តាមប្រព័ន្ធអប់រំរបស់សង្គមជាតិ កត្តាទាំងនេះ គឺបណ្តាលមកពីពួកគេខ្លះជាក្មេងកំព្រា ក្មេងអានាថា ទុរគត៌ គ្មានជីវភាពចិញ្ចឹមជីវិត។
មន្ត្រីលីកាដូ ប្រចាំខេត្តព្រះសីហនុម្នាក់ បាននិយាយថា ពន្ធនាគារមិនមែនជាកន្លែងអប់រំទេ ដូចនេះ ក្មេងៗដែលមានអាយុក្រោម ១៨ ឆ្នាំ ហើយត្រូវសមត្ថកិច្ចចាប់ខ្លួនពីបទល្មើសផ្សេងៗ ហើយត្រូវតុលាការផ្តន្ទាទោសពួកគេដាក់គុក គឺជាហេតុផលមួយ ដែលគួរឲ្យថ្នាក់ដឹកនាំពិចារណារដែរ។
មន្ត្រីរូបនោះបាន បន្តថា ដោយឡែកសម្រាប់កុមារា កុមារីតូចៗ ដែលម្តាយជាប់គុក ហើយកូនៗក៏មកជាប់គុកដែរ វារឹតតែខ្លោចផ្សាទៅទៀត ដែលក្មេងតូចៗទាំងនោះ ដឹងក្តីឡើង បើកភ្នែកឡើង ឃើញតែបរិយាកាសក្នុងបរិវេណគុក ម្យ៉ាងវិញទៀត ចំពោះស្ត្រីមានផ្ទៃពោះកូនរបស់ពួកគេ ក៏ជាប់គុកតាំងពី នៅក្នុងគុកមកដែរ។
របាយការណ៍របស់អង្គការលីកាដូ ប្រចាំខេត្តព្រះសីហនុ បានឲ្យដឹងថាសព្វថ្ងៃនេះ នៅពន្ធនាគារខេត្តព្រះសីហនុ មានអ្នកទោសប្រុសស្រី មានអាយុក្រោម ១៨ ឆ្នាំ ប្រមាណ ១៤ នាក់។ ក្នុងនោះមានអ្នកទោសជាស្រី្ត ២នាក់។ ក្មេងតាមម្តាយមករស់ក្នុងពន្ធនាគារ ៤ នាក់ ( ក្មេងស្រី ២ នាក់ ) និងស្រី្តមានផ្ទៃពោះ ៣ នាក់។
យ៉ាងណាក៏ដោយ មិនទាន់មានការអត្ថាធិប្បាយពីអ្នកគ្រប់គ្រងពន្ធនាគារខេត្តព្រះសីហនុ ជុំវិញក្តីបារម្ភរបស់មន្ត្រីអង្គការសង្គមស៊ីវិលខាងលើនៅនេះនៅឡើយទេ៕
