Facebook ទើបតែទទួលស្គាល់ Page របស់ មាស សុខសោភា ជាផ្លូវការ
នាង/សារព័ត៌មាន Cambodia News/
ភ្នំពេញ (០៨ កញ្ញា ២០១៤) ៖ មានតារាខ្មែរល្បីៗជាច្រើននាក់បានបង្កើនទំព័រអ្នកគាំទ្រ (Fan’s Page) របស់ខ្លួន ពិសេសតារាស្រីៗ មានដូចជា ឱក សុគន្ធកញ្ញា មាស សុខសោភា សុខ ពិសី និងសុគន្ធ នីសា ជាដើម ប៉ុន្តែមានតែ ទំព័ររបស់កញ្ញា មាស សុខសោភា ប៉ុណ្ណោះ ដែលទើបបានទទួលស្គាល់ជាផ្លូវការដោយសញ្ញា Verified ពី Facebook ដោយបានក្លាយជាករណីទី១ក្នុងចង្កោមតារាល្បីៗរបស់ខ្មែរ នេះបើយោងតាមទំព័រ Socialbaker ដែលជាធ្វើការលើបញ្ហានេះ។
ជាមួយនឹងភាពល្បីល្បាញ និងសមត្ថភាពនៃសម្លង កញ្ញា មាស សុខសោភា តារាចម្រៀងស្រីនៅក្នុងផលិតកម្ម Town ដែលទទួលបានការគាំទ្រច្រើនពីបណ្តាលក្រុមយុវវ័យ នាពេលថ្មីនេះ Page របស់កញ្ញា ទើបនឹងទទួលការបញ្ជាក់ជាផ្លូវការដោយសញ្ញា Verified ពី Facebook ខណៈពេលចំនួនអ្នកគាំទ្ររបស់កញ្ញា មាន ជាង ៣០ម៉ឺននាក់ ប៉ុន្តែជាមួយនឹងការបញ្ជាក់ផ្លូវការនេះក៏ត្រូវមានលក្ខខណ្ឌរួមផ្សំមួយចំនួនទៀតផងដែរ។
យ៉ាងណាសញ្ញា Verified មិនចេះតែផ្ដល់ជូនទំព័រនានាដែលមានលើ Facebook ឡើយ ប៉ុន្តែលុះត្រាតែអនុលោមតាមការកំណត់មួយចំនួនរបស់បណ្ដាញសង្គមដ៏ធំមួយនេះ។ តាមការកំណត់របស់ Facebook សញ្ញា Verified ទទួលស្គាល់ផ្លូវការ គឺសម្រាប់ផ្ដល់ជូនទំព័រស្ថិតក្នុងប្រភេទទំព័ររបស់តារាល្បីៗ , ទំព័ររបស់អង្គភាពសារព័ត៌មាន,ទំព័រផ្លូវការរបស់រាជរដ្ឋាភិបាលប្រទេសណាមួយ,ទំព័ររបស់អាជីវកម្ម និងពាណិជ្ជសញ្ញាល្បីៗនានា។
សម្រាប់ការផ្ដល់ការទទួលស្គាល់ទំព័រមួយ ថាជាទំព័រផ្លូវការ ឬទំព័រពិតប្រាកដរបស់បុគ្គល ក្រុមហ៊ុន ឬស្ថាប័នណាមួយ គឺដើម្បីជួយឲ្យអ្នកគាំទ្រនៃទំព័រទាំងនោះ ច្បាស់ក្នុងចិត្តថា ទំព័ររបស់បុគ្គល ក្រុមហ៊ុន ឬស្ថាប័នមួយ ដែលខ្លួនកំពុងគាំទ្រតាមរយៈការផ្ដល់ “Like” គឺជាទំព័រពិតប្រាកដរបស់បុគ្គល ក្រុមហ៊ុន ឬស្ថាប័នទាំងនោះ ខណៈបច្ចុប្បន្នមានទំព័រក្លែងក្លាយរាប់លាននៅលាយឡំជាមួយទំព័រពិតប្រាកដ ដែលធ្វើឲ្យអ្នកប្រើប្រាស់មានការភ័ន្តច្រឡំ៕
