រលំអគារកម្ពស់ ៦ជាន់ នៅថៃ ស្លាប់ ៣នាក់ របួស ១៩នាក់
សារព័ត៌មាន Cambodia News/
ថៃ (១២ សីហា ២០១៤) ៖ មនុស្ស ៣នាក់ បានស្លាប់ និង១៩នាក់ផ្សេងទៀត បានរងរបួសក្នុងហេតុបាក់រលំ អគារកម្ពស់៦ជាន់មួយកន្លែង ដែលកំពុងសាងសង់ ស្ថិតនៅស្រុកថានីយាបូរី ខេត្តប៉ាទុមថានី កាលពី ល្ងាចថ្ងៃចន្ទ ទី១១ ខែសីហា ឆ្នាំ២០១៤។ ក្នុងចំណោមជនរងគ្រោះនោះ មានពលករខ្មែរ និងមីយ៉ាន់ម៉ាផងដែរ ។
សារព័ត៌មានថៃបាងកកប៉ុស្តិ៍ បានឲ្យដឹងថា ការបាក់រលំអគារនេះ បានកើតឡើង ខណៈកម្មករកំពុងធ្វើការសាងសង់នៅជាន់លើគេបង្អស់ នៅវេលាម៉ោង ៤ និង៤០នាទីល្ងាចថ្ងៃទី១២ ខែសីហា។ បើតាមបាងកកប៉ុស្តិ៍ យ៉ាងហោចណាស់មានជនរងគ្រោះ ៣នាក់ ជាពលរដ្ឋខ្មែរ និងមីយ៉ាន់ម៉ា ។
អាជ្ញាធរថៃ បានឲ្យដឹងថា មានកម្មករប្រមាណជា ៣០នាក់ ត្រូវអគាររលំសង្កត់លើ ហើយកម្មករ ១៩នាក់ត្រូវបាន យកចេញពីគំនរអគារ គិតត្រឹមម៉ោង ៨យប់ថ្ងៃម្សិលមិញ៕
