ខ្មែរសញ្ជាតិវៀតណាមទំនងជាមានសិទ្ធិឈរឈ្មោះជាតំណាងរាស្រ្តខ្មែរបានដែរ
ដោយ ឆាយ សុផល
អត្ថបទវិភាគ
ភ្នំពេញ (១៧ កក្កដា ២០១៤ ) ៖ ដោយប្រទេសប្រកាន់យករបបប្រជាធិបតេយ្យ មិនរើសអើងពូជសាសន៍ កម្ពុជាមានតំណាងរាស្រ្តមួយចំនួនមានសញ្ជាតិបរទេស ពិសេសសញ្ជាតិអឺរ៉ុប អាម៉េរិក និងអាស៊ីប៉ាស៊ីហ្វិក។
ខ្ញុំគ្រាន់តែលើកឧទាហរណ៍ជាក់ស្តែងនៅក្នុងគណបក្សសង្រ្គោះជាតិបកបង្ហាញ ដូចជា៖
– លោកជំទាវ មូរ សុខហួរ បេក្ខជនជាប់ឆ្នោតតំណាងរាស្រ្តមណ្ឌលខេត្តបាត់ដំបង មានសញ្ជាតិអាម៉េរិក
– ឯកឧត្តម កែវ ភារម្យ បេក្ខជនជាប់ឆ្នោតតំណាងរាស្រ្តមណ្ឌលខេត្តក្រចេះ មានសញ្ជាតិញីវហ្ស៊ីលែន
– ឯកឧត្តម ម៉ែន សុថាវរិន្ទ្រ បេក្ខជនជាប់ឆ្នោតតំណាងរាស្រ្តខេត្តកំពង់ធំ មានសញ្ជាតិបារាំង
– ឯកត្តម រៀល ខេមរិន្ទ្រ បេក្ខជនជាប់ឆ្នោតតំណាងរាស្រ្តមណ្ឌលខេត្តស្វាយរៀងមានសញ្ជាតិអូស្ត្រាលី
នេះនៅមិនទាន់គិតពីលោកប្រធានបក្ស ឯកឧត្តម សម រង្ស៊ី និងលោកជំទាវជាភរិយាមានសញ្ជាតិបារាំង និងឯកឧត្តមតំណាងរាស្រ្ត សុន ឆៃ មានសញ្ចាតិអូស្ត្រាលីផង ហើយពលរដ្ឋខ្មែរក៏ទំនងជាមិនមានការថ្នាំងថ្នាក់ចិត្តពីការមាន សញ្ជាតិពីររបស់ពួកគេដែរ។
កន្លងមក នៅក្នុងរាជរដ្ឋាភិបាលអាណត្តិទី១ សមាជិកសភាគណបក្សប្រជាជន និងគណបក្សហ៊្វុនស៊ីនប៉ិច ព្រមទាំងគណបក្សឯទៀតៗក៏មានតំណាងរាស្រ្តរបស់ខ្លួនមាន សញ្ជាតិពីរដែរ ពិសេសសញ្ជាតិបារាំងនិងអាម៉េរិក។ សម្តេចក្រុមព្រះ នរោត្តម រណឬទ្ធិ ព្រះប្រធានគណបក្សហ៊្វុនស៊ីនប៉ិចនិបក្សបន្តបន្ទាប់ទៀត មានសញ្ជាតិបារាំង និងអតីតនាយករដ្ឋមន្រ្តី អ៊ឹង ហួត មានសញ្ជាតិ អូស្រ្តាលី ដែរ។
អ្នកនយោបាយទាំងនោះមិនបានលាក់លៀមពីអត្តសញ្ញាណសញ្ជាតិរបស់ខ្លួនឡើយ ព្រោះពួកគេគិតថា ការធ្វើនយោបាយនៅស្រុកខ្មែរមានលក្ខណៈសេរី និងមិនប្រកាន់ជាតិសាសន៍ឡើយ។
សំណួរសួរថា បើថ្ងៃក្រោយ មានខ្មែរដែលមានសញ្ជាតិវៀតណាម ថៃ ចិន និងសញ្ជាតិផ្សេងៗនៅក្នុងពិភពលោក តើពួកគេអាចឈរឈ្មោះជាតំណាងរាស្រ្តខ្មែរដែរឬក៏អត់? ប្រសិនបើមិនបាន តើមានមូលហេតុអ្វី ហើយមានភាពខុសគ្នាយ៉ាងណាពីអ្នកដែលមានសញ្ជាតិអាម៉េរិក អឺរ៉ុប និងប្រទេសផ្សេងទៀត? តើរដ្ឋធម្មនុញ្ញមានបានចែងពីភាពខុសគ្នានៃសញ្ជាតិនេះដែរឬទេ?
ប្រសិនបើ រដ្ឋធម្មនុញ្ញមិនមានចែងពីភាពខុសគ្នាពីចំណុចនេះទេ ពលរដ្ឋខ្មែរដែលមានសញ្ចាតិវៀតណាម និងថៃក៏អាចចូលរួមជាសមាជិកគណបក្សនយោបាយខ្មែរ និងឈរឈ្មោះឲ្យគេបោះឆ្នោតដែរ៕