ពលករបង់ប្រាក់តែ ២០ដុល្លារ សម្រាប់ឯកសារទៅធ្វើការក្រៅប្រទេស
សារព័ត៌មាន Cambodia News/
ភ្នំពេញ(០៤ កក្កដា ២០១៤) ៖ ក្រសួងការងារ ប្រកាសថា ពលករម្នាក់ ត្រូវចំណាយប្រាក់ ត្រឹមតែ២០ដុល្លារប៉ុណ្ណោះ សម្រាប់បំពេញបែបបទ ទៅរកការងារធ្វើនៅក្រៅប្រទេស ។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១ខែកក្កដាឆ្នាំ២០ ១៤ឲ្យដឹងថា ក្រោយពីកិច្ចពិភាក្សាជាមួយដៃគូពាក់ព័ន្ធ បែបបទ ទៅធ្វើការនៅក្រៅប្រទេស តាមរយៈក្រុមហ៊ុន ពលករម្នាក់ត្រូវទទួលបន្ទុកក្នុងការបង់ថ្លៃទិដ្ឋាការការងារ ចំនួន២០ដុល្លារទៅឲ្យស្ថានទូតថៃប្រចាំកម្ពុជាដោយផ្ទាល់។
ក្រសួងការងារបញ្ជាក់ថា តម្លៃថតរូបសម្រាប់ធ្វើលិខិតឆ្លងដែន ចំនួន៤ដុល្លារក្រុមហ៊ុនត្រូវបង់ដោយផ្ទាល់ទៅឲ្យក្រសួងមហាផ្ទៃ រីឯតម្លៃប័ណ្ណពលករកម្ពុជាទៅធ្វើការនៅបរទេសចំនួន១០ដុល្លារគឺក្រុមហ៊ុនត្រូវបង់ដោយផ្ទាល់ទៅឲ្យក្រុមហ៊ុន ហាយសឺលូសិន ហូលឌីង។
ប៉ុន្តែក្រសួងការមិនបានបញ្ជាក់ថា តើទឹកប្រាក់ប៉ុន្មានទៀត ដែលក្រុមហ៊ុន នឹង កាត់យកពីពលករវិញនោះទេនៅពេលបានការងារធ្វើ។
ក្រោយពីមេដឹកនាំយោធាថៃបញ្ជូនពលករចំណាកស្រុកខ្មែរខុសច្បាប់ជាង២០ម៉ឺននាក់មកកម្ពុជាវិញទាំងគំហុកក្នុងខែមិថុនាឆ្នាំ២០១៤នោះ លោកនាយករដ្ឋមន្ត្រីប្រកាសឲ្យធ្វើលិខិតឆ្លងដែនអស់ត្រឹម៤ដុល្លារ។ ចំណែកក្រសួង ការងារប្រកាសឲ្យពលករចំណាយដល់៤៩ដុល្លារ ដោយភ្ជាប់ទាំងតម្លៃបំពេញបែបបទផ្សេង តាមរយៈក្រុមហ៊ុននាំពលករ ប៉ុន្តែក្រោយមកបានបញ្ចុះមកនៅត្រឹម២០ដុល្លារវិញ បន្ទាប់ពីមានពលករតិចតួចទៅបំពេញបែបបទនេះ៕
