កងទ័ពនិងក្រុមបាតុករថៃលេងល្បែងឆ្មាចាប់កណ្ដុរ
សារព័ត៌មាន Cambodia News/
ថៃ (០៣ មិថុនា ២០១៤) ៖ ក្រុមបាតុករប្រឆាំងនឹងការធ្វើរដ្ឋប្រហារក្នុងប្រទេសថៃ បានប្រមូលផ្ដុំគ្នាទៀតហើយកាលពីថ្ងៃទី០១ខែមិថុនា ទាំងនៅក្នុងទីក្រុងបាងកក និងនៅតាមបណ្ដាខេត្ដមួយចំនួនទៀត។
ក្នុងការជួបជុំជាថ្មីនេះ ក្រុមបាតុករបានធ្វើការប្រមូលផ្ដុំនៅទីតាំង០៧កន្លែង ដោយបានបែងចែកក្រុមទៅតាមទីតាំងនីមួយៗ។ ដោយហេតុថា សកម្មភាពរបស់ក្រុមបាតុករអាចនឹងបង្កឱ្យមានការប៉ះទង្គិចគ្នា ក្រុមកងទ័ពរក្សាសណ្ដាប់ធ្នាប់ក៏បានចុះទៅតំបន់ខាងលើ ដើម្បីទប់ស្កាត់ចលនាតវ៉ា។
ចលនាប្រមូលផ្ដុំរបស់ក្រុមប្រឆាំង គេសង្កេតឃើញថា បន្ដិចធ្វើនៅកន្លែងនេះ បន្ដិចធ្វើនៅកន្លែងនោះ ដើម្បីគេចពីការចាប់ខ្លួនរបស់កងទ័ព ហើយសកម្មភាពរបស់ពួកគេ ភាគច្រើនមិនត្រូវបានចាប់ខ្លួនឡើយ ដោយសារតែពេលក្រុមរក្សាសណ្ដាប់ធ្នាប់ចុះទៅដល់ ពួកគេបានទៅធ្វើនៅកន្លែងផ្សេង។
គួរបញ្ជាក់ថា ចាប់តាំងពីលោក ប្រាយុទ្ធ ចាន់អ៊ូចា បានប្រកាសធ្វើរដ្ឋប្រហារក្នុងប្រទេសថៃ កាលពីថ្ងៃទី២២ខែឧសភាកន្លងមក ស្ថានភាពក្នុងប្រទេសថៃ នៅតែជួបបញ្ហានៅឡើយ។
ជួបបញ្ហា ដោយសារតែក្រុមប្រឆាំងនឹងការធ្វើរដ្ឋប្រហារ បាននាំគ្នាតវ៉ា ជាពិសេសមេដឹកនាំរបស់ពួកគេ នៅតែបន្ដកោះហៅក្រុមគាំទ្រខ្លួន ឱ្យចូលរួមចលនាតវ៉ា ដោយគិតថាការដណ្ដើមកាន់អំណាចរបស់កងទ័ព គឺជារឿងមិនត្រឹមត្រូវ៕
