ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ នឹងត្រូវអនុវត្តន៍ចាប់ពីថ្ងៃនេះទៅ
សារព័ត៌មាន Cambodia News/
ភ្នំពេញ (១៩ ឧសភា ២០១៤) ៖ យោងតាមសេចក្តីជូនដំណឹងសរបស់អគ្គនាយកដ្ឋានពន្ធដារ ដែលចុះហត្ថលេខាដោយលោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ កាលពីថ្ងៃទី១៦ ឧសភា បានផ្សព្វផ្សាយជាសាធារណៈនៅថ្ងៃទី១៩ ឧសភា បានបញ្ជាក់ថា អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ នឹងចាប់ផ្តើមប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៤ ចាប់ពីថ្ងៃទី១៩ ឧសភា ដល់ថ្ងៃទី៣១ ធ្នូ ឆ្នាំ២០១៤។
សម្រាប់ការបង់ពន្ធក្នុងឆ្នាំនេះ ម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទ អាចដាក់លិខិត ប្រកាស និងបង់ពន្ធ នៅនាយកដ្ឋានគ្រប់គ្រងអ្នកជាប់ពន្ធធំ ឬនៅសាខាពន្ធដារខេត្ត/ខណ្ឌ ឬនៅសាខាណាមួយនៃ ធនាគារកាណាឌីយ៉ា ឬធនាគារ អេស៊ីលីដា ទូទាំងប្រទេស។
សេចក្តីជូនដំណឹងដដែល បានបញ្ជាក់ទៀតថា ចាប់ពីថ្ងៃទី០១ មករា ឆ្នាំ២០១៥ តទៅ អង្គភាពពន្ធដារនឹងចុះត្រួតពិនិត្យ និងផាកពិន័យចំពោះមធ្យោបាយដឹកជញ្ជូន និងយានជំនិះទាំងឡាយណា ដែលមិនទាន់បានប្រកាសបង់ពន្ធក្នុងឆ្នាំ២០១៤។ ចំពោះមធ្យោបាយដឹកជញ្ជូន និងយានជំនិះគ្រប់ប្រភេទ ដែលមិនបានបង់ពន្ធឆ្នាំ២០១៤ ត្រូវបង់ប្រាក់ពន្ធ និងបង់ប្រាក់ពិន័យ១០០% នៃប្រាក់ពន្ធដែលត្រូវបង់៕
