ឯកឧត្តម ខៀវ កាញារីទ្ធ ៖ អ្នកព័ត៌មានត្រូវគិតពីវិជ្ជាជីវៈ មុនផ្សាយពីអ្នកស្រវឹងស្រាដេកក្នុងឡាន
សារព័ត៌មាន Cambodia News/
ភ្នំពេញ (២២ មិនា ២០១៨) ៖ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានថ្លែងថា អ្នកសារព័ត៌មានមុនចេញផ្សាយអត្ថបទ ពីមនុស្សស្រវឹងស្រា ត្រូវគិត ពិចារណាពីវិជ្ជាជីវៈរបស់ខ្លួនជាមុន ព្រោះការដេកក្នុងរថយន្ត អត់មានអ្វីខុសច្បាប់ តែធ្វើបែបហ្នឹង នឹងកាត់បន្ថយគ្រោះថ្នាក់ចរាចរណ៍។
ការថ្លែងរបស់លោករដ្ឋមន្រ្តីនេះ ក្រោយមានសារព័ត៌មានមួយចំនួន បានចេញផ្សាយអត្ថបទមួយ ទាក់ទងទៅនឹងស្រ្តីវ័យក្មេងម្នាក់ ស្រវឹងស្រា ហើយក៏បានបញ្ឈប់ដំណើរ ដេកក្នុងឡានរបស់ខ្លួន។
ក្នុងបណ្តាញទំនាក់ទំនង សង្គមហ្វេសប៊ុ នៅថ្ងៃទី២២ ខែមីនា នេះ ឯកឧត្តម បានលើកឡើង ថា អ្នកដឹងខ្លួនស្រវឹងឈប់ដេកក្នុងឡាន គឺគួរអាណិតនិងសរសើរ ព្រោះយល់ពីកំរិតសមត្ថភាពខ្លួន ។
ឯកឧត្តមបន្តថា “តែបើយើងនាំគ្នាទៅថតចុះផ្សាយ តើដើម្បីជំរុញឲ្យគាត់បើកបុកគេឯង ដើម្បីខ្លួនឯងមានអត្ថបទផ្សាយ ឬយ៉ាងណា ? បើមិននិយាយដល់វិជ្ជាជីវៈទេ យ៉ាងហោចណាស់ យើងគិតពីកំរិតសីលធម៌ សុជីវធម៌ និង ការអប់រំទៅចុះ” ៕
