បុគ្គលិកក្រុមហ៊ុន Caltex បន្តកូដកម្ម ព្រោះមិនមានដំណោះស្រាយ
សារព័ត៌មាន Cambodia News/
ភ្នំពេញ (១៦ ឧសភា ២០១៤) ៖ បុគ្គលិកស្ថានីយចាក់ប្រេង Caltex ចំនួន៣ របស់ ក្រុមហ៊ុន Chevron នៅបន្តបិទទ្វារធ្វើកូដកម្ម ទាមទារប្រាក់ខែចំនួន ១៦០ដុល្លារ និងប្រាក់ខែទី១៣ ឬប្រាក់ខែប្រចាំឆ្នាំ ចូលដល់ថ្ងៃទី៥ហើយ គិតត្រឹមព្រឹកថ្ងៃទី១៦ ខែឧសភា ឆ្នាំ២០១៤នេះ។
ការបន្តកូដកម្មចូលដល់ថ្ងៃទី៥នេះ បានធ្វើឡើង បន្ទាប់ពីការចរចា រវាង បុគ្គលិកប្រេង Caltex និង ថៅកែក្រុមហ៊ុន Chevron របស់អាមេរិក កាពីថ្ងៃទី១៣ ខែឧសភា មិនត្រូវរ៉ូវគ្នា។ ការបះបោររបស់ក្រុមកម្មករ-បុគ្គលិករបស់ក្រុមហ៊ុនកាល់តិចបាន ធ្វើឡើងទូទាំងក្រុងភ្នំពេញដែលមានសាខាធំៗចំនួន២០ទីតាំង ក្នុងពេលតែមួយព្រមៗគ្នា។
ក្រុមកម្មករទាំងអស់បានលើកឡើងថា ការធ្វើកូដកម្មរបស់ពួកគេនេះមិនពាក់ព័ន្ធក្នុងរឿងនយោបាយទេ តែជាបញ្ហាក្រពះដោយសារតែប្រាក់ខែពួកគេកន្លងមកទទួលបានតិចតួចពេក គឺត្រឹម១១០ដុល្លារ ប៉ុណ្ណោះក្នុង១ខែៗ។
សូមរម្លឹកថា កិច្ចប្រជុំចរចាជិត ៤ ម៉ោង ចាប់ពីម៉ោង ២:៣០ នាទី រសៀលថ្ងៃទី១៣ ឧសភា រវាងភាគីថៅកែក្រុមហ៊ុនប្រេង Chevron និងបុគ្គលិកស្ថានីយ៍ប្រេង Caltex ដែលតវ៉ាទាមទារតម្លើងប្រាក់ខែ ១៦០ ដុល្លារ និងប្រាក់ខែទី១៣ នោះ គឺពុំទទួលបានលទ្ធផលល្អអ្វីឡើយ៕
