ការប្រឡងមធ្យមសិក្សាបឋមភូមិឆ្នាំនេះខ្លះថា រលុងខ្លះថាមានភាពតានតឹង
ដោយ សយ ដុល្លា
ការប្រឡងសញ្ញាប័ត្រមធ្យមសិក្សាបឋមភូមិថ្នាក់ជាតិនៅប្រទេសកម្ពុជា បានប្រព្រឹត្តទៅចំនួន២ថ្ងៃ គឺចាប់ពីថ្ងៃទី១៦ដល់១៧ ខែកក្កដាឆ្នាំ២០១២ ដោយ មានបេក្ខជនចូលរួមប្រឡងចំនួន១៣២.៩៧៤នាក់នៅទូទាំងប្រទេស។ គេឃើញថាបរិយាកាសជាទូទៅនៅថ្ងៃប្រឡងមាន សភាពស្ងប់ស្ងាត់ និងអ៊ូអនៅតាម មណ្ឌលប្រឡងនីមួយៗ។
នៅឯមណ្ឌលប្រឡងវិទ្យាល័យជាស៊ីមសាមគ្គីមានសភាពស្ងប់ស្ងាត់បើប្រៀបធៀបទៅនឹង មណ្ឌលប្រឡងផ្សេងទៀត។ បេក្ខជនម្នាក់ប្រឡងនៅមណ្ឌលប្រឡងនេះបានឲ្យដឹងថា កាប្រឡងនៅឆ្នាំនេះមានសភាពស្ងប់ស្ងាត់ល្អ ប៉ុន្តែកាប្រឡងមានភាពធូរលុង ដោយសារតែមានការសំរួលរបស់លោកគ្រូនិងអ្នកគ្រូអោយសិស្សយកសំណៅឯកសារនិង បើកចំលងពេលម៉ោងប្រឡង “ នៅក្នុងបន្ទប់ខ្ញុំសិស្សនាំគ្នារៃលុយអោយគ្រូជាថ្នូរនិងការ បើកមើលឯកសារនៅពេលប្រឡង”។ ចំនែកឯបេក្ខជនប្រឡងម្នាក់ទៀត ក៏បាន ឲ្យដឹងដែរថា ក៏មានដែរការបែកធ្លាយវិញ្ញាសារក្នុងពេលប្រឡង “ខ្ញុំបានចំលើយ វិញ្ញាសារជីវៈនិងសីលធម៍ពីមិត្តភក្តិរបស់ខ្ញុំគឺថាស្ទើរតែគ្រប់ចំលើយដូចគ្នាទៅនឹងវិញ្ញាសារប្រឡង”។
ងាកទៅមើលមណ្ឌលប្រឡងបាក់ទូកដែលជាមណ្ឌលប្រឡងអ៊ូអរជាងគេដែលមានកម្លាំងសម្ថតិកិច្ចការពារច្រើន។ បេក្ខជនប្រឡង ជា នីន បានឲ្យដឹងថានៅមណ្ឌលប្រឡងនេះមាន សភាពអ៊ូអរមែន ប៉ុន្តែមានការតឹងតែងក្នុងបន្ទប់ប្រឡង “ លោកគ្រូអនុរក្ស គាត់ដកយកប្រ៊ីយ៉ុងខ្ញុំអស់ ហើយមិនអោយមានការចំលងគ្នាថែមទៀត”។
ចំណែកសង្គមស៊ីវិល ដែលធ្វើការជាប់ជាមួយការប្រឡង លោក រ៉ុង ឈុន បានឲ្យដឹងថា តាមការសង្កេតរបស់លោក ការប្រឡងឌីប្លូមឆ្នាំនេះ ក៏មិនខុសពីឆ្នាំមុនៗដែរ គឺនៅតែមានការប្រមូលលុយកាក់ដើម្បីជាថ្នូរ និងការទទួលបានឯកសារចម្លើយ និងការលួចចម្លងគ្នា។ លោក បានបន្ថែមថា “វាគ្មានការប្រែប្រួលអ្វីទេ គឺវាក្លាយជាប្រពៃណីទៅហើយ”។
ទោះបីជាយ៉ាងនេះក៏ដោយមន្ត្រីអប់រំ លោក ជា ជាតិ ប្រធានមន្ទីរអប់រំ យុវជន និងកីឡារាជធានីភ្នំពេញ បាននិយាយថាឆ្នាំនេះការប្រឡងបានប្រព្រឹត្តទៅដោយរលូនដោយគ្មានការសូកប៉ាន់ មានវិ ន័យតឹងរ៉ឹង ការប្រឡងប្រព្រឹត្តទៅដោយភាពស្ងប់ស្ងាត់ល្អ ហើយការទិញនិងលក់សំណៅ ឯកសារគ្មានទេនៅតាមមណ្ឌលនានា។
គួបញ្ជាក់ផងដែរថាការប្រឡងថ្នាក់ជាតិនេះមានពីកំរិតគឺមធ្យមសិក្សាបឋមភូមិ និងមធ្យម សិក្សាទុតិយភូមិដែលគ្រោងនិងប្រឡងនាដើមសប្តាហ៍ក្រោយនេះ៕