កង្កែបក្នុងវាលស្រែអាចជួយបង្កើនទិន្នផលស្រូវ
ភ្នំពេញ (១៨ កក្កដា ២០១២)៖ អង្គការជំនាញការងារកសិកម្មបានបង្ហាញឲ្យដឹងថា សត្វកង្កែបមានតួនាទីសំខាន់បំផុតក្នុងការការពារមិនឲ្យដំណាំស្រូវទទួលរងការបំផ្លាញពីសត្វល្អិត ជាពិសេសនៅដំណាក់កាលដំបូង គឺដំណាក់កាលសំណាប និងពេលស្រូវទើបបែកគុម្ពដំបូង។
នៅក្នុងសេចក្ដីប្រកាសព័ត៌មានមួយរបស់អង្គការសេដាកចេញផ្សាយនាថ្ងៃ ១៧ កក្កដា នេះបានឲ្យដឹងថា កន្លងមកកសិករភាគច្រើនមិនសូវបានយកចិត្តទុកដាក់ក្នុងការអភិរក្សសត្វកង្កែប ដើម្បីឲ្យវាជួយការពារដំណាំស្រូវទេ។
សេចក្ដីប្រកាសព័ត៌មានបានបញ្ជាក់ថា នៅពេលដើមរដូវ កសិករគិតតែនាំគ្នាចាប់កង្កែបធ្វើជាចំណីអាហារនិងលក់ទៅវិញ ដោយការធ្វើរបៀបនេះគឺប្រៀបដូចជាការទប់ស្កាត់មិនឲ្យកង្កែបមានឱកាស បង្កកំណើតឲ្យបានច្រើន ដើម្បីជួយការពារដំណាំស្រូវនិងផ្តល់ផលច្រើននៅពេលក្រោយ។ 
លើសពីនេះទៀត កសិករយើង ក៏បានធ្វើការប្រើប្រាស់សារធាតុគីមីដូចជា ជីគីមីនិងថ្នាំពុលគីមី ដែលនាំឲ្យកង្កែបពុលងាប់ជាពិសេសដោយសារស្បែកកង្កែប ងាយទទួលរងការបំផ្លាញពីសារធាតុគីមីណាស់។
អង្គការសេដាកបានអំពាវនាវឲ្យកសិករគិតគូអភិរក្ស និងចិញ្ចឹមកង្កែបតាមវាលស្រែឲ្យបានគ្រប់គ្នា ដោយអនុវត្តតាមគំនិតសំខាន់ៗ ដូចខាងក្រោម៖
១. សូមនាំគ្នាឈប់ចាប់កង្កែបនៅពេលដើមរដូវ។ បើយើងចង់ចាប់អាចចាប់បានពីពាក់កណ្តាលរដូវទៅ ជាពិសេសនៅពេលស្រូវបែកគុម្ពបានច្រើន។ (កង្កែបវាអាចជួយការពារដំណាំស្រូវពីការបំផ្លាញបាន។ កង្កែបមួយវាអាចស៊ីសត្វល្អិត បានក្នុងបរិមាណស្មើនឹងទម្ងន់ខ្លួនរបស់វា)។
២. កុំប្រើជីគីមីនិងថ្នាំពុលលើស្រូវនិងស្រែឲ្យសោះ។
៣. ប្រើជីធម្មជាតិឲ្យបានច្រើនលើដីស្រែជាពិសេសប្រើកំទេចចំបើង អង្កាម និងស្លឹកឈើ ដើម្បីគ្របដីចន្លោះគុម្ពស្រូវ ព្រោះវាផ្តល់ជាជំរកនិងចំណីបន្ថែមដល់កង្កែប។
៤. រៀបចំឲ្យមានកូនចង្អូរ ថ្លុក ឬប្រឡាយ ស្រះក្នុងស្រែ ដើម្បីផ្តល់ជាជំរកដល់កង្កែប។
៥. ផ្តល់ចំណីបន្ថែមដល់កង្កែបដូចជាកន្ទក់ ចុងអង្ករ និងកាកសំណល់ផ្ទះបាយ។ល។
៦. សហការជាមួយអ្នកជិតខាងដើម្បីការពារកុំឲ្យមានការចូលមកចាប់កង្កែបក្នុងវាលស្រែ។
សេចក្ដីប្រកាសព័ត៌មានបានដកស្រង់សំដីលោកបណ្ឌិត យ៉ង សាំងកុមារ ប្រធានអង្គការសេដាកដោយនិយាយថា “ការអនុវត្តនូវគំនិតខាងលើបានជោគជ័យ មិនត្រឹមតែធ្វើឲ្យកសិករទទួលបានផលស្រូវច្រើនទេ គេអាចប្រមូលផលកង្កែបសំរាប់បរិភោគនិងលក់បានថែមទៀតផង នៅចុងរដូវ ឬក្រោយពេលច្រូតកាត់” ។ លោក សាំងកុមារ បានបន្តថា ដើម្បីទទួលបានផលកង្កែបពីស្រែ គេត្រូវយកសំណាញ់ព័ទ្ធលើដីស្រែនៅពេលចុងរដូវ ដើម្បីការពារកុំឲ្យកង្កែបរត់ចេញពីស្រែបាត់ក្រោយពេលច្រូតកាត់៕ ហេង នាង Cambodia News
