មេបក្សប្រឆាំងបានត្រឹមពិនិត្យការបោះឆ្នោត ខណៈលោក ហ៊ុន សែន មានឱកាសកាន់សន្លឹកឆ្នោត
ភ្នំពេញ៖ លោក សម រង្ស៊ី មេដឹកនាំបក្សប្រឆាំង បានចេញដើរពិនិត្យស្ថានីយបោះឆ្នោតជាច្រើន នៅក្នុងរាជធានីភ្នំពេញ និងខេត្តកណ្ដាល ខណៈលោក ហ៊ុន សែន អនុប្រធានគណបក្សប្រជាជនកម្ពុជា ដែលកំពុងកាន់អំណាចបានកាន់សន្លឹកឆ្នោត បោះចូលហឹប និងបង្ហាញម្រាមដៃ ប្រាប់អ្នករាយការណ៍ព័ត៌មានថា លោកបានបោះឆ្នោតរួចហើយ។
តាមព័តមាន លោក សម រង្ស៊ី បានចេញទៅកាន់ស្ថានីយបោះឆ្នោតមួយនៅក្បែរស្នាក់ការគណបក្សលោក នៅសង្កាត់ចក្រអង្រែលើ តែមិនបានមានលទ្ធភាព ចូលគូសសន្លឹកឆ្នោត ដូចលោកនាយករដ្ឋមន្ត្រី ហ៊ុន សែន នោះទេ។ តែលោកបានប្រាប់អ្នករាយការណ៍ព័ត៌មានថា លោករីករាយ ដោយឃើញប្រជាពលរដ្ឋបានចេញទៅបោះឆ្នោត ដោយមានស្មារតីជាតិ។
ប៉ុន្តែ លោកនាយករដ្ឋមន្ត្រី ដែលដើរចេញពីរយន្តដ៏ទំនើបហើយមានទឹកមុខញញឹម ទៅកាន់ការិយាល័យបោះឆ្នោតមួយនៅក្រុងតាខ្មៅ មិនបានមានប្រសាសន៍ទៅកាន់អ្នករាយការណ៍ព័ត៌មានទេ ខណៈលោកសម រង្ស៊ី ត្រូវបានប្រជាពលរដ្ឋជាច្រើនជាយុវជន បានសាទរ តែឥស្សរជនទាំងពីរ សុទ្ធតែ ត្រូវបានអ្នកកាសែត ផ្ដិតយករូបរៀងៗខ្លួន។
តែនៅពេលលោកទៅដល់ការិយាល័យមួយ នៅវត្តសន្សំកុសល្យរាជធានីភ្នំពេញ មានសកម្មជនគណបក្សប្រជាជនកម្ពុជា បួនប្រាំនាក់តាមឆាឆៅលោក។ តែក្រោយត្រូវបានធូរស្រាលនៅពេលមានអ្នកគាំទ្រលោករាប់រយនាក់ ចេញមកការពារ និងអបអរសាទរ ។
ក្រុមអ្នកវិភាគ បានវិភាគថា គណបក្សប្រជាជនកម្ពុជា របស់លោកនាយករដ្ឋមន្ត្រី និងគណបក្សសង្គ្រោះជាតិរបស់ លោកសម រង្ស៊ី អាចដណ្ដើមគ្នា ឈ្នះក្នុងការបោះឆ្នោត នៅថ្ងៃទី២៨ ខែកក្កដា ឆ្នាំ២០១៣៕ Cambodia News
