ក្រសួងសេដ្ឋកិច្ច និងហិរញ្ញវត្ថុចាប់ផ្តើមប្រមូលពន្ធផ្លូវ ២០១៣ ពីថ្ងៃ ១៥កុម្ភៈ ដល់ថ្ងៃទី ១៥កក្កដា
ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុ បានប្រកាស ឲ្យម្ចាស់មធ្យោបាយដឹកជញ្ជូន និងយានយន្តគ្រប់ប្រភេទ ទៅបង់ពន្ធផ្លូវ ដែលចាប់ផ្តើមអនុវត្តន៍ពីថ្ងៃ ទី១៥ ខែកុម្ភៈ ដល់ថ្ងៃទី១៥ ខែកក្កដា ឆ្នាំ២០១៣ ។
សេចក្តីជូនដំណឹង បានបញ្ជាក់ទៀតថា «ការត្រួតពិនិត្យលើមធ្យោបាយដឹកជញ្ជូន និងយានជំនិះគ្រប់ប្រភេទ សម្រាប់ឆ្នាំ២០១៣ នឹងត្រូវអនុវត្តចាប់ពីថ្ងៃទី១៦ កក្កដា ឆ្នាំ២០១៣ កន្លងទៅ»។
ដើម្បីបង់ពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ ម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទ ត្រូវបំពេញនូវលិខិតប្រកាសពីរសន្លឹក តាមគំរូ របស់អគ្គនាយកដ្ឋានពន្ធដារ លើកលែងតែម្ចាស់ទោចក្រយានយន្ត និងត្រីចក្រយានយន្ត បំពាក់ដោយម៉ាស៊ីនម៉ូតូ ព្រមទាំងត្រូវបង្ហាញ និងប្រគល់ជូន មន្ត្រីដែលមាន សមត្ថកិច្ច នូវបង្កាន់ដៃ បង់ពន្ធឆ្នាំ២០១២ សម្រាប់ភស្តុតាងបញ្ជាក់ថា មធ្យោបាយដឹក ជញ្ជូននិងយានជំនិះនោះ បានបង់ពន្ធឆ្នាំ២០១២រួចហើយ ។
កាលពីចុងខែសីហា ឆ្នាំ២០១២ កន្លងទៅ នាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានចុះកិច្ចព្រមពៀង ជាមួយធនាគារអេស៊ីលីដា ដើម្បីឲ្យធនាគារ មួយនេះទទួលបាន សិទ្ធិលក់ប័ណ្ណពន្ធផ្លូវលើម៉ូតូ និងរ៉ឺម៉កកង់បី សម្រាប់ឆ្នាំ២០១៣ តទៅ។ បានសេចក្តីថា នៅឆ្នាំ២០១៣នេះ ម្ចាស់ម៉ូតូ និងរ៉ឺម៉កកង់ ៣ទាំងអស់ ត្រូវទៅទិញ ប័ណ្ណពន្ធផ្លូវ នៅធនាគារអេស៊ីលីដា៕
