រដ្ឋាភិបាលនឹងអនុវត្ដ ទៅតាមផ្លូវច្បាប់ បើបក្សប្រឆាំងធ្វើអ្វីហួសហេតុ
សារព័ត៌មាន Cambodia News/
ពោធិ៍សាត់ (២៧ មិនា ២០១៤) ៖ លោកនាយករដ្ឋមន្ដ្រីកម្ពុជា ហ៊ុន សែន កាលពីព្រឹកមិញនេះ បានមានប្រសាសន៍ ក្នុងពិធី សម្ពោធដាក់ឱ្យប្រើប្រាស់វារី អគ្គិសនីស្ទឹងអាតៃ និងសម្ពោធអនុស្ថានីយ រួម និងបណ្ដាញបញ្ជូន ខ្សែតុងក្យុង នៅតំបន់ត្រីកោណ ថា បើសិនគណបក្ស សង្គ្រោះជាតិ ធ្វើអ្វី ហួសហេតុនោះ រាជរដ្ឋាភិបាលនឹងអនុវត្ដ ទៅតាមផ្លូវច្បាប់ ។
បើទោះបី ជាលោកនាយករដ្ឋមន្ដ្រី អាណត្តិទី៥ មិនបានបញ្ជាក់ ឱ្យច្បាស់ និងសំដៅឱ្យចំទៅលើការធ្វើមហាបាតុកម្ម របស់គណបក្សសង្គ្រោះជាតិ ដែលប្រកាសចេញពីមេដឹកនាំរបស់ខ្លួន ក៏ដោយនោះ ប៉ុន្ដែលោកនាយករដ្ឋមន្ដ្រី បានមានប្រសាសន៍ ដោយសំដៅទៅលើបញ្ហានេះ។
លោក ហ៊ុន សែន បានមានប្រសាសន៍ដោយសំដៅទៅលើការ លើកឡើង របស់មេដឹកនាំគណបក្សសង្គ្រោះជាតិ ថា និយាយរឿងមហាៗ ប៉ុន្ដែ អ្វីៗនៅពេលនេះ បានដំណើរការគ្រប់យ៉ាង ទាំងសាលារៀន គេមានអ្នកគាំទ្រខាង មហា ហើយក៏មានអ្នក គាំ ទ្រ ខាងអត់មហា ផងដែរ ។
លោកនាយករដ្ឋមន្ត្រី ហ៊ុន សែន បានបញ្ជាក់ ថា “ធ្វើអ្វីក៏ដោយគឺមានខន្ដីញោម បើហួស ខន្ដី ច្បាប់អនុវត្ដហើយ” មានន័យថា បើសិនគណបក្សសង្គ្រោះជាតិ បន្ដប្រកាសធ្វើ មហាបាតុកម្មតទៅទៀត ហើយមិនគោរព ទៅ តាមច្បាប់ និងការ អនុញ្ញាត របស់អាជ្ញា ធរដែនដីនោះ រាជរដ្ឋាភិបាលកម្ពុជានឹងយក ច្បាប់មកអនុវត្ដជាក់ជា មិនខានឡើយ ៕
