ក្រុមអាវក្រហម ស្លៀកពាក់ពណ៌ខ្មៅ ប្រឆាំង របបអាមាត្យ និង តុលាការ
សារព័ត៌មាន Cambodia News/
ថៃ(២៤ មិនា ២០១៤)៖ យោងតាមគេហទំព័រ Thai News នៅថ្ងៃ ចន្ទ ទី ២៤ ខែ មីនា ឆ្នាំ២០១៤ បានចុះផ្សាយឲ្យដឹងថា លោក ចាតុផន ព្រំផាន មេដឹកនាំចលនា ប្រជា ជន ប្រឆាំងនឹងរបប ផ្តាច់ការ (ក្រុមអាវក្រហម) បានថ្លែងថា សមា ជិកក្រុមអាវក្រហមទូទាំងប្រទេសត្រៀមស្លៀកពាក់ខ្មៅ ៧ ថ្ងៃ ចាប់ពីថ្ងៃ ចន្ទ នេះតទៅ។
ការត្រៀមស្លៀកពាក់ខ្មៅ ៧ ថ្ងៃនេះ ក្នុងគោល បំណង បង្ហាញថា ប្រជាជនភាគច្រើន មិនត្រូវការ របប អាមាត្យ និង ប្រព័ន្ធតុលាការ រួមស្ថាប័នឯករាជ្យមួយចំនួន នាពេលបច្ចុប្បន្ន ដែលបានរៀបចំផែនការ ផ្តួល រំលំរបបលទ្ធិប្រជាធិបតេយ្យ នៅក្នុងប្រទេសថៃ ឆ្ពោះទៅរករបបផ្តាច់ការ ។
លោក ចាតុផន បានបន្តទៀតថា បច្ចុប្បន្ន ពួកអាមាត្យ បានរួមដៃគ្នាជាមួយបក្សនយោបាយ រួមទាំង ស្ថាប័ន តុលាការ ដើម្បីក្រាញ់អំណាចរបស់ខ្លួន ដោយមិនបានគិតពីផលប្រយោជន៍ និង សុខទុក្ខ ប្រជារាស្រនោះទេ ដូច្នេះប្រជាជនទូទាំងប្រទេសត្រូវ ក្រោកឡើងតស៊ូជាមួយរបបផ្តាច់ ការទាំង ឡាយឲ្យសាបសូន្យ នឹងនាំប្រទេសជាតិដើរតាមមាគ៌ាលទ្ធិប្រជាធិបតេយ្យពេញលេញ។
នៅថ្ងៃទី ៥ ខែ មេសា ខាងមុខនេះ ក្រុមអាវក្រហមទូទាំងប្រទេសនឹង ធ្វើការដើរក្បួនទ្រង់ទ្រាយធំ ដើម្បីបង្ហាញពីការគាំទ្រ នាយករដ្ឋមន្រ្តី និង សមាជិកសភា ដែលកើតចេញពីការបោះឆ្នោតដោយសេរី និង យុត្តិធម៌ ព្រមទាំង ឆ្លុះបញ្ចាំងពីការ បដិវត្តន៍ប្រជាជនយ៉ាងពិតប្រាកដ៕