លោក ហ៊ុន សែន ប្រឆាំងដាច់ខាតចំពោះគណបក្យណា ដែលយកយុវជនធ្វើជាឆ្នាន់នយោបាយ
សារព័ត៌មាន Cambodia News/
ភ្នំពេញ(២៧ កុម្ភៈ ២០១៤)៖ ថ្លែងក្នុងសន្និសីទចក្ខុវិស័យប្រទេសកម្ពុជាលើកទី៨ នៅក្នុងឆ្នាំ២០១៤ លើប្រធានបទ “កម្ពុជាក្នុងប្រាំឆ្នាំទៅមុខ កំណែទម្រង់ និងភាពប្រកួតប្រជែង នៅក្នុងតំបន់ក្រោយ ធ្វើសមាហរណកម្ម” នៅនៅសណ្ឋាគារអំាងទ័រកុងទីណង់តាល់ នាព្រឹកថ្ងៃទី២៧ ខែកុម្ភ:នេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកការពារចំពោះផលប្រយោជន៍យុវជន តែលោកមិនគាំទ្រសកម្មភាពទាំងឡាយណា ដែលយកអនាគតរបស់យុវជនធ្វើជាឆ្នាន់នយោបាយ។
លោកនាយករដ្ឋមន្ត្រីបន្តថា រាជរដ្ឋាភិបាល នឹងពង្រឹងវិស័យអប់រំ ការអប់រំនៅថ្នាក់ឧត្តមសិក្សា បង្កើនការបណ្តុះបណ្តាលវិជ្ជាជីវៈ និងបង្កើតការងារសម្រាប់យុវជន។ លោកបញ្ជាក់ថា រហូតមកដល់ពេលនេះ ប្រទេសកម្ពុជា កង្វះធនធានមនុស្សជាយុវជនលើផ្នែកវិទ្យាសាស្ត្របច្ចេកវិទ្យា និងវិស្វកម្ម ដែលជាឧបសគ្គក្នុងការដាក់វិនិយោគទុនពីបរទេស និងកម្រិតលទ្ធភាពយុវជនកម្ពុជា ក្នុងការទទួលបានការងារ និងលើកម្ពស់ជីវភាពរបស់ពួកគេ៕