រដ្ឋមន្ត្រីថ្មីក្រសួងអប់រំ ចាប់ផ្តើមរឹតបន្តឹងការប្រឡងបាក់ឌុប
សារព័ត៌មាន Cambodia News/
ភ្នំពេញ(២៧ កុម្ភៈ ២០១៤)៖ រដ្ឋមន្ត្រីក្រសួងអប់រំ យុវជន និងកីឡាថ្មី ចាប់ផ្តើមរឹតបន្តឹងការប្រឡងសញ្ញាបត្រមធ្យមសិក្សាទុតិយភូមិ(ថ្នាក់ទី ១២) ក្នុងគោលបំណងធានាគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានក្នុងការប្រឡង។
ក្រសួងអប់រំ បានចេញសេចក្តីប្រកាសមួយស្តីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិ ដែលចុះហត្ថលេខាដោយរដ្ឋមន្ត្រីក្រសួងអប់រំ លោក ហង់ ជួនណារ៉ុន នៅថ្ងៃទី៣១ខែមករា។
ប្រកាស នេះ មាន២៥ប្រការ ដែលនិយាយពីការរៀបចំសំណុំលិខិតចុះឈ្មោះប្រឡង និងបេក្ខភាព ការកំណត់ថ្ងៃប្រឡង និងមណ្ឌលប្រឡង ការដាក់ពិន្ទុ និងការរៀបចំគណៈមេប្រយោគមណ្ឌលសំណេរជាដើម។ តាមរយៈប្រកាសនេះ រដ្ឋមន្ត្រីថ្មីក្រសួងអប់រំ នឹងធ្វើការដោយផ្ទាល់លើបញ្ហាមួយចំនួននៃការប្រឡងបាក់ឌុបនេះ។
ប្រកាសរបស់ក្រសួង ឲ្យដឹងថា ប្រធានមន្ទីរអប់រំ យុវជន និងកីឡា នៅតាមបណ្តាខេត្តនានា ត្រូវធ្វើសំណើរសមាសភាពគណៈមេប្រយោគ និងគណៈកម្មការផ្សេងៗជូនរដ្ឋមន្ត្រីអប់រំ ដើម្បីពិនិត្យ និងសម្រេចតាមឋានានុក្រម លើកលែងតែបុគ្គលិកអប់រំថ្នាក់កណ្តាល ដែលស្នើដោយប្រធានអង្គភាព។ ប្រកាសបន្តថា ក្នុងករណីក្រសួងអប់រំ ពិនិត្យឃើញថា ការប្រឡងមានភាពមិនប្រក្រតី ត្រូវបង្កើតគណៈកម្មការកោសល្យវិច័យ ដែលគណៈកម្មការនេះ ត្រូវចាត់តាំងដោយរដ្ឋមន្ត្រីក្រសួងផ្ទាល់៕
