ក្រសួងមហាផ្ទៃសម្រេចបិទអាជីវកម្ម ស៊ីសា នៅទូទាំងប្រទេស
សារព័ត៌មាន Cambodia News/
ភ្នំពេញ(២៦ កុម្ភៈ ២០១៤)៖ នៅក្នុងពិធីបិទសន្និបាតបូកសរុបការងាររបស់សាលារាជធានីភ្នំពេញ នៅរសៀលម៉ោង ២ ថ្ងៃទី២៦ ខែកុម្ភៈ នេះ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចដាក់បទបញ្ជាដល់អាជ្ញាធរ និងប៉ូលិស ឲ្យបិទអាជីវកម្ម ស៊ីសា នៅទូទាំងប្រទេស។
ក្រសួងមហាផ្ទៃសម្រេចបិទអាជីវកម្ម ស៊ីសានេះ ធ្វើឡើងបន្ចាប់ពីលោក ប៉ា សុជាតិវង្ស អភិបាលរាជធានីភ្នំពេញ បានប្រកាស ស្នើទៅកាន់រាជរដ្ឋាភិបាល ដើម្បីសុំគោលការណ៍បិទអាជីវកម្ម ស៊ីសា នៅរាជធានីភ្នំពេញ កាលពីម្សិលមិញនៅក្នុងពិធីបើកសន្និបាតបូកសរុបការងារ របស់សាលារាជធានីភ្នំពេញ។
ទោះជា មានការអះអាងដូចនេះក្តី លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ មិនបានធ្វើអត្ថាធិប្បាយបែបណាទេ ជុំវិញសេចក្តីសម្រេចចិត្តរបស់លោកឧបនាយករដ្ឋមន្ត្រី ស ខេង ក្នុងការសម្រេចបិទអាជីវកម្ម ស៊ីសា៕
