ជម្ងឺពងបែកក្នុងមាត់ និង វិធីព្យាបាល
សារព័ត៌មាន Cambodia News/
សុខភាព(២៤ កុម្ភៈ ២០១៤)៖ ជម្ងឺពងបែកក្នុងមាត់ កើតឡើងជាញឹកញាប់ហើយជាសះស្បើយ ទៅវិញដោយឯកឯងមិនចាំបាច់ព្យាបាលឡើយ ជម្ងឺនេះ បណ្ដាលឱ្យមានការឈឺចាប់នៅ ក្នុងមាត់ និងពិបាកក្នុងការទទួលទានអាហារផងដែរ។
ជម្ងឺពងបែកក្នុងមាត់គឺ សំដៅដល់ជម្ងឺមួយប្រភេទដែលកើតមាននៅក្នុង មាត់ ដែលភាគច្រើនកើតមាននៅលើមនុស្សក្មេង និងយុវវ័យ។ ផ្ដើមដំបូងឡើងជម្ងឺពងបែកក្នុងមាត់មានពងទឹកតូច ឬធំ ទៅតាមសណ្ឋាននីមួយៗរបស់វា។ 
ហើយ ពងទឹកនេះក៏បានធ្លាយទឹករួចក្លាយទៅជាដំបៅរលាកសើស្បែក ដែលស៊ីស្បែករាក់ ឬជ្រៅទៅតាមកម្រិតនីមួយៗរបស់វានៅក្នុងមាត់រួចក៏បង្កទៅជាជម្ងឺពងបែក ក្នុងមាត់។
គេមិនអាចព្យាបាលឱ្យជាដាច់នោះទេ ព្រោះជម្ងឺនេះកើតឡើងជាញឹកញាប់និងជាសះស្បើយទៅវិញដោយឯកឯង។ ប៉ុន្ដែគេអាចព្យាបាលវាបានបណ្ដោះអាសន្ន ដោយប្រើ ឱសថដើម្បីបំបាត់ការឈឺ ចាប់។
ចំពោះលោកអ្នកមានពងបែកក្នុងមាត់ កម្រិតតូច ត្រូវប្រើថ្នាំខ្ពុរមាត់ណាដែលបំបាត់ការឈឺចាប់និងជាតិថ្នាំផ្សះ បើប្រភេទកម្រិតធំវិញត្រូវប្រើថ្នាំ ប៉ូម៉ាតដែលជួយបំបាត់ការឈឺចាប់ ដែលមាន ប្រសិទ្ធភាពខ្ពស់ក្នុងការព្យាបាលឱ្យជាសះស្បើយរយៈពេលខ្លី។
ទោះបី ជាជម្ងឺពងបែកក្នុងមាត់ជាជម្ងឺដែលកើតបាត់ៗ និងជាសះស្បើយដោយឯកឯងក៏ដោយប៉ុន្ដែអ្នកជម្ងឺក៏មិនត្រូវធ្វេសប្រហែស ក្នុងការព្យាបាលដែរ។ ព្រោះពងទឹកខ្លះដែលកើតមកវាស៊ីជ្រៅបន្ដិចម្ដងៗរហូតធ្វើឱ្យមានដំបៅ ដល់ស្បែកស្រទាប់ខាងក្នុង ហើយមិនព្រមជាសះស្បើយឯកឯងសោះនោះ វាក៏អាចធ្វើឱ្យមានគ្រោះថ្នាក់ដល់ជីវិតដែរ។ ដូច្នេះអ្នកជម្ងឺគួរទៅជួបគ្រូពេទ្យឯកទេស ជាបន្ទាន់ ដើម្បីព្យាបាលទាន់ពេល៕