ក្រសួង វប្បធម៌ណែនាំឱ្យសិល្បកររក្សាក្រមសីលធម៌សេចក្ដីថ្លៃថ្នូរ
សារព័ត៌មាន Cambodia News/
ភ្នំពេញ(២៤ កុម្ភៈ ២០១៤)៖ សេចក្ដីណែនាំនិងអំពាវនាវនៅលើគេហទំព័រ របស់ក្រសួងវប្បធម៌និងវិចិត្រសិល្បៈកាលពី ពេលថ្មីៗនេះ ផ្ញើជូនសិល្បករសិល្បការិនីខ្មែរឱ្យមានការគោរពក្រមសីលធម៌ វិជ្ជាជីវៈរបស់ខ្លួនឱ្យបានខ្ជាប់ខ្ជួន ។
សេចក្ដីណែនាំ និងអំពាវ នាវនេះបានធ្វើឡើយក្រោយពេលគេដឹងថា សិល្បករមួយចំនួនក្នុងពេលបច្ចុប្បន្ន បានប្រព្រឹត្ដខុសទៅនឹងក្រមសីលធម៌វិជ្ជាជីវៈពិសេសសិល្បការិនីដែល តែងនិយម ស្លៀកពាក់លេចលើខើចក្រោមសម្ញែង ភ្នែកមហាជននោះ ។
ការ ចេញ សេចក្ដីណែនាំនិងអំពាវនាវនេះត្រូវបានក្រសួងសង្កេតឃើញថា មួយ រយៈចុងក្រោយនេះគេឃើញមានសិល្បករសិល្បការិនីមួយចំនួនតូចបានប្រើ ប្រាស់ប្រព័ន្ធព័ត៌មាននិងរូបភាពគ្រប់បែបយ៉ាងដើម្បីទាក់ទាញការ គាំទ្រពីស្រទាប់មហាជនដោយភ្លេចគិតថា រូបភាព និងមធ្យោបាយខ្លះគឺផ្ទុយស្រឡះពីវប្បធម៌និងសេចក្ដីថ្លៃថ្នូររបស់ ជាតិ ។
ប្រភពពី មន្ដ្រីនៃក្រសួងវប្បធម៌ និង វិចិត្រសិល្បៈបានទម្លាយថា ការចេញសេចក្ដីប្រកាសអំពាវនាវនេះត្រូវបាន ធ្វើឡើងក្រោយពីតារាសម្ដែងនិងតារាចម្រៀងមួយចំនួនបានបង្ហាញនូវ ការ ស្លៀកពាក់សិចស៊ីជ្រុលហួសហេតុដែលនាំឱ្យមានការរិះគន់យ៉ាងធ្ងន់ធ្ងរ ពីមហា ជនថាបាននិងកំពុងធ្វើឱ្យសិល្បៈវប្បធម៌ជាតិអាប់ឱន ។
គេ នៅមិន ទាន់ដឹងទេថា តើការចេញសេចក្ដីណែនាំនិងអំពាវនាវនេះអាចមានប្រសិទ្ធភាពកម្រិតណា នៅឡើយ ប៉ុន្ដែកន្លងមកសិល្បករមួយចំនួនតូចត្រូវបាន មន្ដ្រីក្រសួងព័ត៌មាននិងក្រសួងវប្បធម៌ ហៅមកធ្វើការណែនាំទាក់ទងទៅនឹងការស្លៀកពាក់សិចស៊ីជ្រុលហួសហេតុ ដែល គេគិតថាអាចនាំឱ្យជះឥទ្ធិពលអវិជ្ជមានដល់វប្បធម៌ជាតិ ៕
