ឆាយ ស្រីពេជ្រ ម្តាយបង្ខំឲ្យយកប្តី
សារព័ត៌មាន Cambodia News/
ភ្នំពេញ(២២ កុម្ភៈ ២០១៤)៖ តារាសម្តែងស្រីស្រស់សម្រស់ ស្រគត់ស្រគំ កញ្ញា ឆាយ ស្រីពេជ្រ បានត្រៀម ខ្លួនចូលរោងការ ជាមួយអាណិកជនខ្មែរ រស់នៅ អាម៉េរិក ទាំងបង្ខំចិត្ត ដោយសារតែ ចង់ផ្គាប់ចិត្តម្តាយ ខណៈដែលនាងបានបង្ហាញក្ដី សោកស្ដាយ អាជីពសិល្បៈ របស់នាង កំពុងតែកាក់កប ស្ទើររកពេលសម្រាកគ្មាន។
កញ្ញា ឆាយ ស្រីពេជ្រ បានឲ្យដឹងថា អនាគតស្វាមី ដែលនាងត្រៀម រៀបការជាមួយ គឺជាអាណិកជនខ្មែរ រស់នៅអាម៉េរិក មានវ័យ៤៤ឆ្នាំ ជាវេជ្ជបណ្ឌិត ។
បើទោះ ជានាង និងគ្រួសារបាន សម្រេចចិត្តថា រៀបការជាមួយគ្នា ក៏ពិតមែន តែនាង និងអនាគតស្វាមីនោះ មិនដែលបានជួបមុខគ្នា ផ្ទាល់ទេ តែដោយសារតែគ្រួសារ ជាពិសេសម្តាយ របស់នាង មានការពេញចិត្ត ពេញថ្លើមខ្លាំង លើសាមីខ្លួនខាងប្រុស និងសាច់ញាតិរបស់គេ ទើបម្តាយនាងសម្រេចចិត្ត ឲ្យនាងរៀបការជាមួយគ្នា ។
តារាស្រីវ័យ២១ឆ្នាំ ឆាយ ស្រីពេជ្រ បានប្រាប់ទៀតថា ចាស់ទុំទាំងសងខាង បាននិយាយគ្នា គន់គូរកវេលារៀបការរួចហើយ បើសិនជាឆាប់រៀបការ អាចក្រោយបុណ្យចូលឆ្នាំខ្មែរ ឬក៏ពន្យារដល់ក្នុងអំឡុងខែ វិចិ្ឆកា ខាងមុខនេះ ក៏ថាបាន។
សម្រាប់ការរៀបចំពិធីមង្គលការ គឺខាងប្រុសជាអ្នករៀបចំចាត់ចែង គ្រប់យ៉ាងទាំងអស់ សម្រាប់រឿងផ្សេងពីនេះ នាងក៏មិនបានដឹងច្បាស់ទេ ព្រោះថាចាស់ទុំ បាននិយាយគ្នាត្រៀមគ្រប់យ៉ាងអស់ហើយ ។
ទាក់ទងនឹ ងការលើកឡើង បែបនេះ ម្តាយរបស់ កញ្ញា ស្រីពេជ្រ ក៏បានប្រាប់ឲ្យដឹង ស្រដៀងគ្នាផងដែរថា “ខ្ញុំគិតថា ការៀបការ របស់កូនស្រីខ្ញុំ ជារឿងល្អ ទោះជារៀបការ ហើយចេញទៅរស់នៅឆ្ងាយ ពីភ្នែកពីច្រមុះខ្ញុំ ក៏ដោយ ក៏ខ្ញុំទុកចិត្ត នឹងជឿជាក់ ថាកូនខ្ញុំ នឹងទទួលបាន សុភមង្គល ព្រោះថាខ្ញុំស្គាល់ពី គ្រួសារ និងអនាគត កូនប្រសារច្បាស់ គេជាមនុស្សល្អ ដឹងខុសត្រូវ គ្រប់គ្រាន់ ចាស់ចិត្តចាស់គំនិត អាចធ្វើថែកូនខ្ញុំបានល្អ ” ។
ជាមួយ គ្នានោះ ស្រីពេជ្រ ក៏បានបង្ហើបពី ពន្លកស្នេហ៍ថ្មី របស់ពួកនាង ថា “ខ្ញុំមិនធ្លាប់ បានជួបមុខ ជាមួយអនាគត ស្វាមីទេ កន្លងមកធ្លាប់ តែជួបគ្នាតាមប្រព័ន្ធ អ៊ីនធើណេត (Sky) និយាយទៅ ខ្ញុំសារភាពថា ការរៀបការលើកនេះ គឺម្តាយរបស់ខ្ញុំ ជាអ្នកគិតគូ និងចង់ឲ្យខ្ញុំរៀបការ ក៏ពិតមែន។ តែសម្រាប់ខ្ញុំ ក៏មានចិត្តស្រឡាញ់គាត់ (អនាគតស្វាមី) ដែរ ទើបសម្រេចចិត្តតាមម៉ាក់។
តែអ្វីដែលខ្ញុំនៅ សោកស្តាយ នៅមិនទាន់ដាច់ចិត្តនោះ គឺការងារសិល្បៈ ព្រោះថាពេលនេះ ខ្ញុំកំពុងតែមមាញឹក និងស្រវាបាន ប្រជាប្រិយភាព ខ្លាំងគួរសម ដោយមានផលិកម្ម និងស្ថានីយទូរទស្សន៍ ជាច្រើនទាក់ទង ថតរឿង ។ ស្រាប់តែសុខៗ បែរជា ត្រូវដកខ្លួនចេញពីសិល្បៈ ព្រោះក្រោយពី ខ្ញុំរៀបការ គឺ ខ្ញុំត្រូវចេញ ទៅរស់នៅក្រៅ ប្រទេសតាមប្ដី ខ្ញុំពិតជាស្ដាយអាជីព សិល្បៈណាស់៕
