ព្រះមហាក្សត្រ បួងសួង សុំសេចក្តីសុខ ដល់ប្រជាជាតិ និងមាតុភូមិ
សារព័ត៌មាន Cambodia News/
ភ្នំពេញ(១២ កុម្ភៈ ២០១៤)៖ កាលពីព្រឹកថ្ងៃទី១១ ខែកុម្ភះ ព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះ មហាក្សត្រនៃព្រះរាជាណាចក្រកម្ពុជា បានសព្វព្រះរាជហរទ័យ ស្តេចយាងបំពេញព្រះរាជកិច្ច ប្រពៃណីរបស់ជាតិ ក្នុងព្រះរាជពិធីបួងសួង ដើម្បីសុំសេចក្ដីសុខ ដល់ប្រទេសជាតិ ដែលបានប្រារព្ធធ្វើនៅប្រាសាទព្រះខ័ន ស្ថិតឃុំរណសិរ្ស ស្រុកសង្គមថ្មី ខេត្តព្រះវិហារ។
-
ព្រះមហាក្សត្រ បួងសួង សុំសេចក្តីសុខ ដល់ប្រជាជាតិនិងមាតុភូមិ។ ព្រះរាជ ពិធីបុណ្យបួងសូងនេះបានរៀបចំប្រកបដោយភាពឧត្តុង្គឧត្តម បំផុតដោយមានគ្រឿង សក្ការៈ បូជា និង ការប្រគំថ្វាយភ្លេងប្រពៃណីបុរាណខ្មែរថ្វាយចំពោះព្រះតេជៈបារមី អតីត ព្រះ មហាក្សត្រ ព្រះមហា ក្សត្រីយានីខ្មែរគ្រប់ព្រះអង្គ ព្រមទាំងព្រះអង្គចេក ព្រះអង្គចម ព្រះអង្គគោកធ្លក ព្រះអង្គរយ ព្រះអង្គពាន់ ព្រមទាំងទេវតាថែរក្សាតំបន់ប្រាសាទព្រះខ័ន និងទេវតាថែរក្សាព្រះរាជាណាចក្រកម្ពុជា និងព្រះ ឥន្ទ ព្រះព្រហ្ម ជាពិសេសដួងព្រះវិញាណក្ខន្ធរបស់ព្រះមហាវីរក្សត្រ ព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ សូមជួយបីបាច់ថែរក្សាព្រះរាជាណាចក្រកម្ពុជានិងបងប្អួនប្រជារាស្ត្រ ខ្មែរគ្រប់ៗរូប សូមឲ្យបានប្រកបតែនឹង សេចក្តីសុខ សុភមង្គល ត្រជាក់ត្រជុំ ចម្រុងចម្រើនក្នុងជីវភាពសង្គម និង ក្រុមគ្រួសារជាដរាបតទៅ។
ជាពិសេសសូមជូយអភិបាលគ្រងរក្សានិង ប្រោះព្រំនូវទឹកអម្រឹត ប្រសិទ្ធពរជ័យ បវរសួស្តី មហាប្រសើរ ថ្វាយព្រះករុណាជាអម្ចាស់ជីវិតលើត្បួងនិងសម្តេចព្រះមហាក្សត្រី ព្រះវររាជមាតា ជាតិខ្មែរជាទីសក្ការៈដ៏ខ្ពង់ ខ្ពស់បំផុត សូមព្រះអង្គបានប្រកបនូវព្រះបរមសុខគ្រប់ប្រការ មានព្រះរាជសុខ ភាពល្អបរិបូរណ៍ ព្រះកាយពល មាំមួន និងមានព្រះជន្មាយុយ៉ឺនយូរជាងរយព្រះវស្សា ដើម្បីគង់ប្រថាប់ នៅជាម្លប់ដ៏ត្រជាក់ត្រជុំដល់កូនចៅ ចៅ ទូត របស់ព្រះអង្គជារៀងរហូតតទៅ ៕