សុវណ្ណ រិទ្ធី ហៅតាវ៉ិចទ័រ ចេញមុខសុំទោស ជំនួស នាយក្រូច

សារព័ត៌មាន​ Cambodia News/

ភ្នំ​ពេញ(១១ កុម្ភៈ ២០១៤)៖នៅព្រឹកថ្ងៃទី១១ ខែកុម្ភៈ នេះ លោក សុវណ្ណ រិទ្ធី ហៅតាវិចទ័រ ជាអ្នកដឹកនាំ និងជាអ្នកនិពន្ធ រឿងកំប្លែង ឲ្យក្រុមតារាកំប្លែងនាយ ពែកមី បានសម្តែង ការសោកស្តាយ ចំពោះកាយវិការ មិនសមរម្យ របស់នាយក្រូច ធ្វើឲ្យប៉ះពាល់ កិត្តិយសបង ប្អូនខ្មែរ-ឥស្លាម ។

លោក សុវណ្ណ រិទ្ធី បានថ្លែងប្រាប់ ថា លោកសូមសម្តែង ការសោកស្តាយ ដែល​សមា​ជិក​ក្រុម​កំប្លែង បានសម្តែងរឿងធ្វើឲ្យប៉ះពាល់ អារម្មណ៍បងប្អូនខ្មែរ-ឥស្លាម នាពេលកន្លងមក ប៉ុន្តែ​លោក​គិតថា នេះគឺជាកំហុសអចេតនា ព្រោះតែក្នុងបំណងមួយ ដើម្បីឲ្យតែមហាជន ផ្ទុះ​សំណើច​ក្អាកក្អាយ ប៉ុណ្ណោះ ពោលគឺគ្មានចេតនា និងបន្ទោសបង្អាប់ បងប្អូនជនជាតិ ខ្មែរ-ឥស្លាម ដែលប្រកាន់ខ្ជាប់ នូវសាសនារបស់ខ្លួនឡើយ ។

ដោយឡែក សម្រាប់តារាកំប្លែង នាយ ក្រូច មិនអាចទាក់ទង សុំការបំភ្លឺជុំវិញប្រតិកម្មនេះ បានទេ ខណៈដែលទូរស័ព្ទចូល ជាច្រើនដង ប៉ុន្តែគ្មានអ្នកទទួល ។

គួរបញ្ជាក់ថា នាយក្រូច ជាតារាកំប្លែងមានឈ្មោះល្បី ក្នុងក្រុមនាយ ពាក់មី ប្រចាំស្ថា​នីយ៍​ទូរទស្សន៍ CTN កាលពីពេលថ្មីនេះ ត្រូវបានសមាគមខ្មែរ-ឥស្លាម បញ្ចេញប្រតិកម្ម និង​បាន​ធ្វើការព្រមាន ឲ្យសុំទោសជាសាធាណៈ ពាក់ព័ន្ធនឹងការសម្ដែងរបស់លោក ប៉ះពាល់កិត្តិយស របស់បងប្អូនជនជាតិឥស្លាម។

ការប្រតិកម្ម និងព្រមានជាសាធារណៈ នៅពេលនេះ គឺបន្ទាប់ពីនាយក្រូច បាន​សម្ដែង​រឿង​កំប្លែង ជាមួយនាង អ៉ីត កាលពីឆ្នាំ ២០១១ ក្នុងកម្មវិធីពិព័រណ៍ ពាណិជកម្មភូមិមួយ ផលិត​ផល​មួយ ដែលបានធ្វើឡើងក្នុងខេត្តកែប។

នៅក្នុងឈុតឆាក ដែលនាយក្រូចសម្ដែងជាមួយនាង អ៉ីត គឺលោកបានដើរតួជា គ្រូដាក់ស្នេហ៍ ជនជាតិខ្មែរ-ឥស្លាម ដោយបានតែងខ្លួន និង​និយាយ​តាមបងប្អូនឥស្លាម ទាំងអស់​ដោយ​ក្នុង​ពេល​សម្ដែង នាយក្រូច បាននិយាយចំអេសចំអាស ក្នុងឋានៈខ្លួនកំពុងដើរតួជាគ្រូដាក់ស្នេហ៍ ដែលធ្វើឲ្យអ្នកទស្សនា គិតថា គ្រូស្នេហ៍ជាជនជាតិចាម តែងតែប្រព្រឹត្តិទង្វើមិនគប្បីបែបនេះ ។ បញ្ហានេះបានធ្វើឲ្យសមាគមខ្មែរ-ឥស្លាម មានការខឹងសម្បារ ព្រោះគ្រូស្នេហ៍ ជា​ជន​ជាតិ​ឥស្លាម ​មិនដែលប្រព្រឹត្តិទង្វើ មិនសមរម្យ បែបនេះឡើយ៕