សពឪពុកលោក ហ៊ុន សែន នឹងបញ្ចុះនៅវត្តវង្កដ្ឋបុរី
Cambodia News/
ភ្នំពេញ៖ សពឪពុករបស់លោកនាយករដ្ឋមន្ត្រី ហ៊ុន សែន នឹងត្រូវដង្ហែចេញពីភូមិគ្រឹះរបស់លោក ហ៊ុន សែន នៅវិមានឯករាជ្យ នៅវេលាម៉ោង៥ព្រឹកថ្ងៃទី១៧ ខែកក្កដា ឆ្នាំ២០១៣ ទៅបញ្ចុះនៅវត្តវង្កដ្ឋបុរី នៅសង្កាត់ទឹកថ្លា។
ក្បួន នៃពិធីដង្ហែសពអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង នឹងធ្វើឡើងនៅតាមមហាវិថីព្រះនរោត្តម ហើយនៅពេលដែលក្បូនដង្ហែសពទៅដល់មន្ទីរពេទ្យព្រះអង្គឌូង នឹងមានព្រះសង្ឃជាច្រើនអង្គនៅទីនោះ ដើម្បីសូត្រធម៌បង្សុកូលជូនដល់ដួងវិញ្ញាណក្ខន្ធសពលោកតា ហ៊ុន នាង។
បន្ទាប់មក ក្បួនដង្ហែសព នឹងធ្វើដំណើរតាមមហាវិថីសហព័ន្ធរុស្ស៊ី ដល់មុខសាកលវិទ្យាល័យភូមិន្ទភ្នំពេញ នឹងមានព្រះសង្ឈជាច្រើនអង្គ សូត្រធម៌ឧទ្ទិសកុសលដល់សពលោកតា ហ៊ុន នាង ម្តងទៀត មុននឹងសពត្រូវដង្ហែទៅដល់វត្តវង្កដ្ឋបុរី ដែលស្ថិតនៅសង្កាត់ទឹកថ្លា ដើម្បីបញ្ចុះជាមួយនឹងសពភរិយាលោកតា ហ៊ុន នាង ដែលត្រូវបានគេបញ្ចុះនៅវង្កដ្ឋបុរី នោះ៕