សេវាកម្មរថយន្តក្រុងសាធារណៈនឹងដាក់ឲ្យដំណើរនៅព្រឹកថ្ងៃស្អែកនេះ
សារព័ត៌មាន Cambodia News /
ភ្នំពេញ(៤ កុម្ភៈ ២០១៤) ៖ សាលារាជធានីភ្នំពេញ នឹងដាក់សម្ពោធឲ្យប្រើប្រាស់សេវាកម្មរថយន្តក្រុងសាធារណៈសាក ល្បង នៅលើមហាវិថីព្រះមុនីវង្ស ចាប់ផ្តើមពីថ្ងៃទី៥ ខែកុម្ភៈ ស្អែកនេះ ដល់ថ្ងៃទី៤ ខែមីនា ឆ្នាំ២០១៤។
នៅ ព្រឹកថ្ងៃទី៤ ខែកុម្ភៈ នេះ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងថា ពិធីសម្ពោធសេវាកម្មរថយន្តក្រុងសាធារណៈនេះ នឹងធ្វើឡើងនៅខាងមុខស្ថានទូតបារាំង បណ្តោយផ្លូវព្រះមុនីវង្ស វេលាម៉ោង ៧ និង៣០នាទីព្រឹក ថ្ងៃទី៥ ខែកុម្ភៈ ស្អែកនេះ
ក្រោមអធិបតីភាពអភិបាលរាជធានីភ្នំពេញ លោក ប៉ា សុជាតិវង្ស ក្រោមកិច្ចសហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA)។
លោក ឡុង ឌីម៉ង់ បន្តថា តាមគម្រោងសាលារាជធានីភ្នំពេញ នឹងដាក់ដំណើរការសាកល្បងរថយន្តក្រុង ចំនួន១០គ្រឿង តាមបណ្តោយមហាវិថីផ្លូវព្រះមុន្នីវង្ស ចំនួន ៣៦ចំណត ចាប់ពីចំណតរង្វង់មូលស្តាតចាស់ មកដល់ចំណតគល់ស្ពានច្បារអំពៅ ក្នុងតម្លៃត្រឹម ១៥០០រៀល ក្នុង១ជើង។
គួររំលឹកថា កាលពីឆ្នាំ២០០១ កម្ពុជា បានដាក់ឲ្យប្រើប្រាស់សេវានេះម្តងរួចមកហើយ តែបរាជ័យទៅវិញ ដោយសារការមិនចាប់អារម្មណ៍ ពីអ្នកធ្វើដំណើរ និងកង្វះខាតជំនួយ៕
