គ្រួសារសព លោក ជា វិជ្ជា ស្នើឲ្យរដ្ឋាភិបាលស្វែងរកឃាតករពិតមកផ្តន្ទាទោស
សារព័ត៌មាន Cambodia News /
ភ្នំពេញ(២២ មករា ២០១៤) ៖ នៅថ្ងៃទី២២ ខែមករានេះ ក្រុមគ្រួសារសព លោក ជា វិជ្ជា បានទទូចជាថ្មីទៀត ឲ្យរដ្ឋាភិបាល លោក ហ៊ុន សែន ស្វែងរកឃាតករពិត ដែលបាញ់សម្លាប់មេដឹកនាំសហជីពដ៏ល្បីល្បាញរូបនេះ មកផ្តន្ទាទោសតាមច្បាប់។
នៅ ក្នុងពិធីគោរពវិញ្ញាណក្ខន្ធសពលោក ជា វិជ្ជា គម្រប់១០ឆ្នាំ ប្អូនប្រុសរបស់លោក ជា វិជ្ជា គឺលោក ជា មុនី បានស្នើឲ្យរដ្ឋាភិបាលស្វែងរកឃាតករពិតមកផ្តន្ទាទោស ដើម្បីផ្តល់យុត្តិធម៌ដល់លោក ជា វិជ្ជា នឹងបញ្ឈប់ការប្រើហិង្សា និងការបាញ់សម្លាប់ពលរដ្ឋខ្មែរ ប្រធានសហជីព និងកម្មករស្លូតត្រង់តទៅទៀត។
លោក ជា វិជ្ជា អតីតប្រធានសហជីពសេរីកម្មករកម្ពុជា ត្រូវបានខ្មាន់កាំភ្លើង បាញ់ចំនួនបីគ្រាប់ បណ្តាលឲ្យស្លាប់ភ្លាមៗនៅនឹងកន្លែងកើតហេតុ កាលពីថ្ងៃទី២២ ខែមករា ឆ្នាំ២០០៤ខណៈលោកកំពុងឤនសារព័ត៌មាន នៅមុខតូបលក់កាសែតមួយ ជាប់នឹងរបងវត្តលង្កា ស្ថិតក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ៕
