នំអន្សមយក្ស មួកស្លឹកត្នោតយក្ស អង្រុតយក្ស កន្ត្រងប្រហុកយក្ស បំពង់ទឹកត្នោតយក្ស នឹងបង្ហាញខ្លួននៅអង្គរសង្ក្រាន្ត
សារព័ត៌មាន Cambodia News/
អត្ថបទ៖ ហេង នាង/
ភ្នំពេញ (១៣ មីនា ២០១៥) ៖ នំអន្សមយក្ស មួកស្លឹកត្នោតយក្ស អង្រុតយក្ស កន្ត្រងប្រហុកយក្ស បំពង់ទឹកត្នោតយក្ស ការទាញព្រ័ត្រយក្ស ល្បែងចត្រង្គ ឬ ល្បែងអុកយក្ស ការប្រណាំងរទេះគោ ក្របី គោយន្ត និងត្រាក់ទ័រ ការរាំចង្វាក់ម៉ាឌីហ្សូន នឹងបង្ហាញខ្លួននៅអង្គរសង្ក្រាន្ត ឆ្នាំ២០១៥ នៅខេត្តសៀមរាប រយៈពេលបីថ្ងៃ ចាប់ពីថ្ងៃទី១៤-១៦ ខែមេសា។
ក្នុងព្រឹត្តិការណ៍នោះដែរក៏មានធ្វើកន្ត្រប្រហុកយក្ស ដែលមានទម្ងន់ ១៥០គីឡូក្រាម បណ្តោយ ៦,១០ម៉ែត្រ កម្ពស់ ១,២ម៉ែត្រ បើប្រៀបធៀបជាមួយ កន្ត្រងប្រហុកធម្មតា គឺមានទម្ងន់តែ ៧៥ក្រាម បណ្តោយ ៤សង់ទីម៉ែត្រ កម្ពស់ ០,៤៥ សង់ទីម៉ែត្រ ដោយប្រើរយៈពេល ចំនួន៧ថ្ងៃ។
រីឯមួកស្លឹកត្នោតយក្សវិញ មានទម្ងន់ដល់ទៅ ១៩១,៥ គីឡូក្រាម ដោយប្រើសរសដែក ទម្ងន់៨០គីឡូក្រាម ឫស្សី ចំនួន ៤៨គីឡូក្រាម ស្លឹកត្នោត ទម្ងន់ ៦០គីឡូក្រាម ខ្សែរិតត្រៀល និងឃ្នង់ ទម្ងន់ ២គីឡូក្រាម និងខ្សែដេរស្លឹក ១,៥គីឡូក្រាម ប្រើរយៈពេល២៣ថ្ងៃ ទើបរួចរាល់។
ចំណែកនំអន្សមយក្សឆ្នាំនេះមានទម្ងន់ធ្ងន់ជាងឆ្នាំមុន គឺទម្ងន់ ៣,២ តោន នេះគិតតែងគ្រឿងផ្សំតែប៉ុណ្ណោះ មិនទាន់គិតពីខ្សែចំណង និងស្លឹកចេកទេ (ឆ្នាំមុនមានទម្ងន់២តោន) និងអង្រុតយក្ស មានទម្ងន់ ៣៥០គីឡូក្រាម បូកទាំងជន្ទល់ជ្រែង មានកម្ពស់ ៥,៥ម៉ែត្រ ប្រើរយៈពេលធ្វើ២៤ថ្ងៃ និងបំពង់ទឹកត្នោតយក្ស មានកម្ពស់ ១,២ម៉ែត្រ អាចដាក់ទឹកបានប្រមាណ១៥លីត្រ៕
