លោក Rod Sims ចង់ឲ្យអូស្ត្រាលីទាញប្រយោជន៍ពីការលក់សម្បត្តិកម្មសិទ្ធិរដ្ឋ
លោក Rod Sims ប្រធានគណៈកម្មការមើលការខុសត្រូវប្រយោជន៍អតិថិជន និងកិច្ចការប្រកួតប្រជែងអូស្ត្រាលី (ACCC) មានប្រសាសន៍ថា ការពិនិត្យឡើងវិញនៃឫសគល់ និងមែកធាងនៃគោលនយោបាយប្រកួតប្រជែងបង្កើតឡើងដោយរដ្ឋាភិបាល ប្រទេសអូស្ត្រាលី គួរតែប្រព្រឹត្តទៅឲ្យទូលំទូលាយបំផុតព្រោះថា ការធ្វើឯកជនីយកម្មសម្បត្ដិរដ្ឋទៅឲ្យក្រុមហ៊ុនឯកជន និងការដែលទីផ្សារមានលក្ខណៈប្រកួតប្រជែងជាងមុន នាំមកនូវភាពប្រសើរបំផុតនៃការរីកចម្រើនផ្នែកការផលិតភាព ការងារ។
លោក Rod Sims មានប្រសាសន៍ថា ជាដំបូងរដ្ឋាភិបាលរដ្ឋនីមួយៗគួរលក់កម្មសិទ្ធិក្រុមហ៊ុនអគ្គិសនី របស់រដ្ឋ ឲ្យទៅក្រុមហ៊ុនឯកជនកាន់កាប់។ លោក Rod Sims ជឿជាក់ថា ការធ្វើដូច្នេះ នឹងធ្វើឲ្យថ្លៃអគ្គិសនីធ្លាក់ចុះ។
តាមរយៈ កិច្ចសម្ភាសន៍ ដែលមានចុះក្នុងអត្ថបទមួយនៃទំព័រកាសែត Australian Financial Review កាលពីព្រឹកមិញនេះសរសេរថា លោក Rod Sims អំពាវនាវឲ្យរដ្ឋាភិបាលអូស្ត្រាលីលក់ Medibank Private ដែលជាក្រុមហ៊ុនធានារ៉ាប់រងសុខភាពរបស់រដ្ឋ និង Australia Post ដែលជាសេវាប្រៃសណីយរបស់អូស្ត្រាលីទៅឲ្យក្រុមហ៊ុនឯកជន។
ក៏ប៉ុន្តែ លោក Rod Sims បានប្រាប់ News Radio ថា លោកមិនគាំទ្រការលក់សម្បត្តិកម្មសិទ្ធិរដ្ឋមួយចំនួននោះទេ៕ (Radio Australia)
