សុគន្ធ និសា មិនទាន់ច្បាស់ម្ចាស់ចិត្ត
ភ្នំពេញ៖ តារាចម្រៀង សុគន្ធ និសា និងបុរសពោះម៉ាយកូនពីរ ម្ចាស់ចម្ការកៅស៊ូរាប់រយហិកតារ នៅខេត្តកំពង់ចាម ទំនងចេញជារូបរាងឆាប់ៗនេះ ហើយក្រោយពីនាងផ្តាច់ទំនាក់ទំនងជាមួយបុរសអាណិកជនខ្មែរ នៅអាមេរិក ដែលតាមប្រលោមស្នេហ៍នាង ជាង ១ឆ្នាំមកនោះ។
មានព័ត៌មានលេចឮថា មានម្ចាស់ចម្ការកៅស៊ូរាប់រយហិកតារ នៅ ខេត្តកំពង់ចាម ដែលត្រូវបានគេស្គាល់ ថា ជាកូនប្រុសមន្ត្រីជាន់ខ្ពស់ម្នាក់ ក្នុងស្ថាប័នជាតិ មានទ្រព្យសម្បត្តិ ស្តុកស្តម្ភ មិនចាញ់ឧកញ៉ាក្នុងស្រុក មួយចំនួន និងមានអាជីវកម្ម ជាច្រើនកន្លែង នៅទូទាំងប្រទេស កម្ពុជា នោះបានតាមស្រលាញ់ តារាចម្រៀងសុគន្ធ និសា ហើយ បើសុគន្ធ និសា យល់ព្រមទទួល ស្នេហ៍ពីបុរសនោះ នាងនឹងរស់នៅ ក្នុងភាពហ៊ឺហា ដោយមិនបាច់ ពឹងផ្អែកលើអាជីពភ្លើងពណ៌នេះឡើយ។ ប៉ុន្តែតារាស្រីវ័យក្មេង រូបនេះ ហាក់មិនទោរទន់ទៅនឹង ឥទ្ធិពលទឹកប្រាក់របស់បុរសនោះទេ ដោយនាងចង់មានមុខរបរខ្លួនឯង ទើបមិនទាន់សម្រេចចិត្តទទួលយកស្នេហ៍ថ្មី។
ទោះយ៉ាងណា ប្រភពកៀកកិតនឹងនិសា បាន បង្ហើបឱ្យដឹងថា ពេលនេះបុរសពោះម៉ាយរូបនោះ ថ្ពក់យកបានបេះដូងតារាចម្រៀងមុខមានមន្តស្នេហ៍ សុគន្ធ និសា ហើយ ប៉ុន្តែពុំមែនយកអំណាចទឹកប្រាក់ ទៅប្រជែងជាមួយបុរសអាណិកជនខ្មែរ នៅអាមេរិក ដែលតាមប្រជែងស្នេហ៍និសា ដែរនោះទេ តែដោយសារតែអំពើល្អ និងក្តីស្នេហ៍ស្មោះ ដែលធ្វើឱ្យនិសា មានទំនុកចិត្ត។ ប្រភពដដែលបន្តថា បុរសម្ចាស់ ចម្ការកៅស៊ូរូបនោះ ជាបុរស ស្លូតបូត និងមានចំណេះវិជ្ជាខ្ពង់ខ្ពស់ ។
ដោយឡែក ប្រភពព័ត៌មានពីអ្នកជំនួញជ័រកៅស៊ូ នៅខេត្តកំពង់ចាម បាន ឱ្យដឹងថា គេឧស្សាហ៍ឃើញតារាចម្រៀង សុគន្ធ និសា ទៅណាមកណាជាមួយបុរស ថៅកែចម្ការកៅស៊ូនោះណាស់ មើលទៅ ដូចជាគូស្នេហ៍ថ្មោងថ្មីអ៊ីចឹង ប៉ុន្តែនិសា តែងភ្ជាប់ម្តាយរបស់នាងទៅជាមួយ ដោយ មិនហ៊ានទៅតែ២នាក់បុរសនោះឡើយ។ ដូច្នេះមានការលើកឡើងថា តារាចម្រៀង វ័យក្មេងរូបនេះ មិនទាន់ប្រាកដក្នុងចិត្ត ចំពោះចំណងស្នេហ៍មួយនេះទេ ទើបនាង មិនហ៊ានទៅណាមកណាតែ២នាក់នោះ។
ទុយពីការលើកឡើងខាងលើ ប្រភពកៀកកិតនឹង និសា ប្រាប់ថា សម្ព័ន្ធស្នេហ៍មួយនេះ កំពុងមានសញ្ញា ល្អ អាចឈានដល់អាពាហ៍ពិពាហ៍ ព្រោះតារាចម្រៀង សុគន្ធ និសា ក៏បានសិក្សាបុរសពោះម៉ាយរូបនោះ អស់ហើយដែរ តែអ្វីដែលអ្នកទាំងពីរមិនទាន់យល់ស្របគ្នានោះ គឺការដកខ្លួនពីសង្វៀនសិល្បៈ ក្រោយរៀបការរួច ព្រោះនិសា មិនទាន់ដាច់អាល័យពី សិល្បៈ ដែលជាអាជីពសាងភាពល្បីឈ្មោះឱ្យនាង នេះទេ ហើយបើការចរចាគ្នាត្រូវ គឺច្បាស់ណាស់ថា គូស្នេហ៍ទាំងពីរ នឹងដឹកដៃគ្នាចូលរោងការតាមប្រពៃណី ដូចតារាសិល្បៈមួយចំនួនមិនខាន។
ទោះយ៉ាងណា ដំណឹងខាងលើនេះ មិនទាន់ ទទួលការបកស្រាយពីតារាចម្រៀងសុគន្ធ និសា នៅឡើយ ដោយសារការទាក់ទងទៅនាងមិនបាន សម្រេច កាលពីចុងសប្តាហ៍មុននេះ។ ហើយយើងសង្ឃឹមទទួលបានការបញ្ជាក់ពីសុគន្ធ និសា នៅពេល ក្រោយ៕ ស.រ/Cambodia News
