ខាត់ សុឃីម របូតឱកាសក្តាប់ប្រាក់ ជិត៧០ម៉ឺនដុល្លារ
ភ្នំពេញ៖ តារាចម្រៀងល្បីឈ្មោះបែបក្រម៉ិចក្រមើមអ្នកនាងខាត់ សុឃីមកាលពីប៉ុន្មានមួយរយៈមុននេះបានចរចារគ្នាប្រកាសលក់ផ្ទះសំអាងការនៅក្បែរផ្សារដេរប៉ូជាមួយថៅកែធំម្នាក់ក្នុងតម្លៃ៧០ម៉ឺនដុល្លារគួបជាមួយផ្ទះនៅជាប់គ្នារបស់អ្នកជិតខាងម្នាក់ដោយដំបូងបានព្រមព្រៀងគ្នាថាលក់។
ប៉ុន្តែបន្ទាប់ពីអ្នកនាងខាត់ សុឃីមប្រជុំគ្នានិយាយរឿងនេះជាមួយបងបង្អូននិងស្វាមីស្រាប់តែអ្នកនៅជាប់ផ្ទះនាងគេងឿកមិនព្រមលក់វិញទើបបណ្តាលឲ្យសុឃីមមានអារម្មណ៍ស្មុគចិត្តនៅពេលខ្ទាតឱកាសក្តាប់លុយទាំងគីបៗទាំងមិននឹកស្មានតែមួយពព្រិចភ្នែក។
ដោយសារតែអ្នកមកទិញជាថៅកែធំមានលុយស្តុកទើបបានសម្រេចចិត្តឲ្យតារាចម្រៀងសំដីផ្អែមពូកែខាងក្លែមពាក្យកំប្លុងកំប្លែងអ្នកនាងខាត់ សុឃីមដែលបានបើកមុខជំនួញជាសំអាងការនិងអ៊ុតសក់នៅផ្សារដេរប៉ូតាំងពីយូរឆ្នាំមកហើយនោះលក់ចេញដើម្បីច្បាមយកទឹកប្រាក់ដ៍សន្ឋឹកកម្រជួបទោះជាត្រូវប្តូរទីតាំងថ្មីមានហុងស៊ុយល្អក៍ដោយ។
អ៊ីចឹងហើយទើបតារាចម្រៀមដែលឆ្លងកាត់ព្យុះភ្លៀងព័ត៌មានរហូតឆ្លងផុតរឿងអាប់អួរនិងកំពុងតែមានក្តីសុខជាមួយស្វាមីក្មេងជាងខ្លួនលោកផាណូខាត់ សុឃីមហាក់កើតនៅរឿងស្មុគស្មាញទៅវិញបន្ទាប់ពីដំណឹងដែលស្ទើរតែក្លាយជារឿងពិត១០០%ជុំវិញករណីលក់ផ្ទះក្តោបប្រាក់បានរបូតចេញវិញដោយសារតែអ្នកនៅជិតខាងនាងគេជូនពាក្យលែងសហការព្រងព្រៀងលក់រួមគ្នាដូចពីជំហានដំបូងដែលបាននិយាយគ្នានោះ។
ថ្លែងប្រាប់អ្នកយកព័ត៌មានយើងតារាយ៉េរៗដែលចូលចិត្តឡើងច្រៀងម្តងៗនិយមធ្វើឲ្យពុកម៉ែបងប្អូនសើចសប្បាយខាត់ សុឃីមប្រាប់ថានាងរីករាយមែនទែននៅពេលដែលដឹងថាផ្ទះនាងត្រូវបានថៅកែម្នាក់គេចូលមកចែចូវសុំទិញទាំងផ្ទះបើកសំអាងការជាន់ផ្ទាល់ដីនិងផ្ទះនៅខាងលើដែលនាងទើបតែឲ្យប្តីបើកជាហាងថតរូបមាន២ល្វែងហើយចំកែងផ្លូវទៀត។
លើសពីនោះអ្នកទិញគេបានសុំទិញជាមួយផ្ទះអ្នកជិតខាងម្នាក់នៅជាន់ផ្ទាល់ដីជាប់សំអាងការនាងដែលជាផ្ទះនៅកែងផ្លូវរួចយើងទាំងអស់គ្នាបានសម្រេចសួរនាំគ្នាពីរឿងនេះថារឿងលក់ទាំងអស់គ្នានេះយើងយល់ព្រមលក់ក្នុងតម្លៃរួមប៉ុន្មានដើម្បីឲ្យឆាប់បានចេញព្រោះលោកថៅកែនោះគេប្រាប់ថាយកតំបន់ផ្ទះនាងនោះធ្វើជាកន្លែងបើកភោជនីយដ្ឋានទ្រង់ទ្រាយធំទើបទិញទាំងលើទាំងក្រោមដោយឲ្យតម្លៃជំហានដំបូងតែ៥០ម៉ឺនដុល្លារទេ។
ប៉ុន្តែតម្លៃជំហានទី១នោះយើងព្រមព្រៀងគ្នាថាអត់ត្រូវថ្លៃគ្នាទេដោយសហការគ្នាក្នុងតម្លៃ៧០ម៉ឺនដុល្លារវិញហើយត្រូវបានភាគីខាងថៅកែគាត់យល់ព្រមទិញទាំងអស់ដោយមិនសូញសាញទេរង់ចាំតែដល់ថ្ងៃធ្វើសំបុត្រកក់លុយ។
តែដឹងអីខាងផ្ទះកែងជាប់នាងគាត់បែរជាងឿកមិនព្រមលក់វិញទោះជាសួរនាំគាត់ដែរតែនៅតែមិនព្រមដោយប្រាប់ថាចង់បានលើសនេះដែលហួសពីតម្លៃហាងឆេងដីធ្លីនៅតំបន់នោះដ្បិតតែជិតផ្សារទីប្រជុំជនមែន។
ម្ល៉ោះហើយទើបលោកថៅកែនោះគេក៍មិនព្រមទិញវិញលើសពីតម្លៃដែលគាត់សួរនាំដំបូងហើយបើផ្ទះណាមួយមិនព្រមលក់គាត់ក៍មិនទិញទាំងអស់ព្រោះគេចង់បានកន្លែងធំបើកហាងទើបនាងនិងអ្នកជិតខាងដេកស្ងាបទាំងអស់គ្នាតែម្តងព្រោះគេនាំលាភមកដល់ផ្ទះហើយបែរជារបូតខ្ទាតចេញពីដៃគួរឲ្យសោកស្តាយទៅវិញ។
ទោះយ៉ាងណាអ្នកនាងខាត់ សុឃីមនៅតែរំពឹងថានៅឱកាសក្រោយច្បាស់ជាមានថៅកែល្អគេមកសួរនាំម្តងទៀតហើយនាងគិតថានិងត្រូវរ៉ូវគ្នាមិនខានបើទោះជានាងមិនទ័លច្រកផ្នែកសេដ្ឋកិច្ចគ្រួសារមែនតែបើចេញក្រឡាចំណេញទាំងដុលៗមិនលំបាកកេងសន្សំលុយនោះនាងនៅតែបញ្ចេញផ្ទះខាងលើដដែលរកកន្លែងណាមានតម្លៃធូរថ្លៃទុកលុយរកស៊ីតទៅទៀតសំខាន់ជាង៕ ស.រ