អាមេរិកថាសកម្មភាពនាវាចម្បាំងចិននៅសមុទ្រចិនខាងត្បូងជា “ទង្វើខ្វះការទទួលខុសត្រូវ”
ភាពចម្រូងចម្រាសជុំវិញការប្រឈមមុខ ដាក់គ្នា រវាងនាវាចម្បាំងចិន និងនាវាចម្បាំងអាមេរិក នៅសមុទ្រចិនខាងត្បូង នៅតែបន្តកើតមាន។ កាលពីថ្ងៃព្រហស្បតិ៍ម្សិលមិញ លោកឆាក់ ហេហ្គ័ល (Chuck Hagel) រដ្ឋមន្រ្តីក្រសួងការពារជាតិអាមេរិក បានហៅសកម្មភាពរបស់យោធាចម្បាំងចិន នៅក្នុងសមុទ្រចិនខាងត្បូង កាលពីដើមខែធ្នូនេះថាជា “ទង្វើខ្វះការទទួលខុសត្រូវ”។
“សកម្មភាពរបស់នាវាចម្បាំងចិន ដែលបើកកាត់ពីមុខ នាវាចម្បាំងអាមេរិក តែប្រមាណជា ៩០ម៉ែត្រ គឺជាទង្វើគ្មានការទទួលខុសត្រូវ” នេះគឺជាការអះអាងរបស់លោកឆាក់ ហេហ្គ័ល នៅក្នុងសន្និសីទសារព័ត៌មាន ធ្វើឡើង កាលពីថ្ងៃព្រហស្បតិ៍ម្សិលមិញ នៅរដ្ឋធានីវ៉ាស៊ីងតោន។
គួររំឭកឡើងវិញ ថា ការប្រឈមមុខដាក់គ្នា រវាងនាវាចម្បាំងអាមេរិក និងនាវាចម្បាំងចិន បានកើតមានឡើង កាលពីថ្ងៃទី៥ ធ្នូ នៅខាងត្បូងកោះហៃណាន់ ក្នុងសមុទ្រចិនខាងត្បូង។ រដ្ឋាភិបាលអាមេរិកបានធ្វើការតវ៉ាអំពីរឿងនេះ ទៅកាន់មេដឹកនាំចិន។ ក្រសួងការពារជាតិចិនបានទទួលស្គាល់ថាពិតជាមានហេតុការណ៍នេះមែន ហើយហាក់ព្យាយាមនិយាយសម្របសម្រួល ដើម្បីបន្ធូរភាពតានតឹង។ ក៏ប៉ុន្តែ កាសែតផ្លូវការរបស់ចិនវិញ បានហៅសកម្មភាពរបស់នាវាចម្បាំងអាមេរិក នៅក្នុងសមុទ្រចិនខាងត្បូងថាជា “ការគំរាមកំហែងដល់សន្តិសុខចិន”។
កាលពីថ្ងៃព្រហស្បតិ៍ម្សិលមិញនេះ គឺជាលើកទីមួយ ដែលរដ្ឋមន្រ្តីក្រសួងការពារជាតិអាមេរិកចេញមុខដោយផ្ទាល់ រិះគន់ចិនជាសាធារណៈ អំពីហេតុការណ៍ នៅសមុទ្រចិនខាងត្បូងនេះ។ លោកឆាក់ ហេហ្គ័លបានបញ្ជាក់ថា សកម្មភាពរបស់នាវាចម្បាំងចិន ដូចដែលបានកើតឡើង កាលពីដើមខែធ្នូ គឺជាសកម្មភាពប្រកបដោយគ្រោះថ្នាក់ ដែលអាចជាផ្កាភ្លើងឆេះរាលដាលជាជម្លោះធំ ហើយថា ចិន និងអាមេរិក ត្រូវតែជជែកគ្នា ដើម្បីដាក់ចេញនូវយន្តការរួម ដើម្បីបញ្ចៀសការប៉ះទង្គិចគ្នា។
ឧត្តមសេនីយ៍ Martin Dempsey នាយអគ្គសេនាធិការចម្រុះកងទ័ពអាមេរិក ដែលស្ថិតនៅក្នុងសន្និសីទសារព័ត៌មាន កាលពីម្សិលមិញនេះដែរ បានអះអាងថា មន្រ្តីយោធាអាមេរិក និងចិនបានបង្កើតជាក្រុមការងារមួយរួចហើយ ដើម្បីជជែកអំពីវិធានរួម ដែលកងទ័ពទាំងសងខាងត្រូវអនុវត្ត ក្នុងករណីមានការប្រទះគ្នានៅទីសមុទ្រ ឬនៅលើអាកាស ឬនៅក្នុងទីអវកាស៕ដោយ សេង ឌីណា (RFI)
