ពាក់ព័ន្ធនឹងការរំសាយអាវុធនុយក្លេអ៊ែរ កូរ៉េខាងជើង ប្រាប់ឱ្យប្រមុខ UN ប្រយ័ត្នសម្ដី

សេអ៊ូល ៖​កាល​ពី​ថ្ងៃ​១៤ ខែសីហា ឆ្នាំ​២០២២ ក្រសួងការបរទេសកូរ៉េខាងជើង បានរិះគន់អគ្គលេខាធិការអង្គការសហប្រជាជាតិ លោក Antonio Guterres ចំពោះការគាំទ្រដល់ការរំសាយអាវុធនុយក្លេអ៊ែរកូរ៉េខាងជើងទាំងស្រុង ហើយបានប្រាប់ឱ្យប្រមុខ UN ប្រយ័ត្នប្រយែងពាក្យសម្ដី នៅចំពោះមុខភាពតានតឹងនៅលើតំបន់ឧបទ្វីបកូរ៉េ។

ប្រតិកម្មរបស់ក្រសួងការបរទេសកូរ៉េខាងជើង ដែលធ្វើឡើងនៅក្នុងសេចក្ដីថ្លែងការណ៍មួយចេញផ្សាយដោយប្រព័ន្ធផ្សព្វផ្សាយរដ្ឋ KCNA កើតមានឡើងបន្ទាប់ពី លោក អាន់ Antonio Guterres កាលពីថ្ងៃសុក្រកន្លងទៅនេះ បាន​បង្ហាញ​ការគាំទ្រយ៉ាង​ពេញ​ទំហឹង​ចំពោះ​ការរំសាយអាវុធនុយក្លេអ៊ែររបស់កូរ៉េខាងជើងទាំងស្រុង ក្នុងជំនួបជាមួយប្រធានាធិបតីកូរ៉េខាងត្បូង លោក យូន ស៊ុក យុល (Yoon Suk-yeol)។

សេចក្ដីថ្លែងការណ៍ដដែល ក៏បានចាត់ទុកផងដែរថា ការកត់សម្គាល់របស់ លោក Guterres មានភាពលម្អៀង ដោយសារតែកន្លងមក ទីក្រុងព្យុងយ៉ាង បានបញ្ជាក់ជំហរថា ការរំសាយអាវុធនុយក្លេអ៊ែរ ត្រូវតែធ្វើឡើងនៅទូទាំងតំបន់ ឧបទ្វីបកូរ៉េទាំងមូល ហើយក្នុងនោះរួមមានទាំងការដកកងទ័ព និងសព្វាវុធរបស់សហរដ្ឋអាមេរិកចេញពីតំបន់ផងដែរ មិនមែនប្រើពាក្យរំសាយអាវុធនុយក្លេអ៊ែរ កូរ៉េខាងជើងតែម្នាក់ឯងនោះទេ៕

​