បក្សប្រឆាំងថៃបើកកិច្ចប្រជុំដើម្បីសំរេចថា តើត្រូវចូលរួមការបោះឆ្នោតខែកុម្ភៈ រឺយ៉ាងណា
នៅប្រទេសថៃថ្ងៃចន្ទទី១៦ធ្នូនេះ គណបក្សប្រជាធិបតេយ្យ ដែលជាបក្សប្រឆាំងដ៏សំខាន់បានបើកកិច្ចប្រជុំដើម្បីសំរេចថា តើបក្សខ្លួនត្រូវចូលរួមក្នុងការបោះឆ្នោត នៅថ្ងៃ២កុម្ភៈ ឆ្នាំ២០១៤ ខាងមុខនេះ រឺក៏យ៉ាងណា។ បក្សប្រឆាំងថៃបានទទួលជោគជ័យក្នុងបាតុកម្មប្រឆាំងរដ្ឋាភិបាល ធ្វើអោយនាយករដ្ឋមន្ត្រី យីងឡាក់ ស៊ីណាវ៉ាត្រា រំលាយរដ្ឋសភា និងស្នើអោយមានការបោះឆ្នោតមុនកាលកំណត់ ដើម្បីដោះស្រាយវិបត្តិនយោបាយ។
នៅ ថ្ងៃចន្ទនេះ នៅប្រទេសថៃ គណបក្សប្រជាធិបតេយ្យ ដែលជាគណបក្សប្រឆាំងដ៏សំខាន់ និងជាបក្សមានវ័យចំណាស់ជាងគេ បានបើកកិច្ចប្រជុំជជែកគ្នា ដើម្បីសំរេចថា តើបក្សខ្លួនត្រូវចូលរួមក្នុងការបោះឆ្នោត នៅថ្ងៃ២កុម្ភៈ ឆ្នាំ២០១៤ ខាងមុខ ដែររឺទេ។ កិច្ចប្រជុំនេះនឹងបិទបញ្ចប់នៅថ្ងៃអង្គារស្អែក។
បាតុកម្មដឹកនាំ ដោយបក្សប្រឆាំងថៃ ដែលមានការចូលរួមពី អតីតនាយករដ្ឋមន្ត្រីអភិសិត វេចាជីវ៉ា បានសំរេចជោគជ័យ រហូតធ្វើអោយនាយករដ្ឋមន្ត្រី យីងឡាក់ ស៊ីណាវ៉ាត្រា រំលាយរដ្ឋសភាចោល និងស្នើអោយមានការបោះឆ្នោតមុនកាលកំណត់។ ទោះយ៉ាងនេះក្តី មេដឹនាំបក្សប្រឆាំងជាច្រើនរូប បានទាត់ចោលការផ្តួចផ្តើមរបស់លោកស្រីយីងឡាក់ ដោយបានទាមទារអោយមានការព្យួរចោលនូវស្ថាប័ននានា និងអោយមានការបង្កើតក្រុមប្រឹក្សាប្រជាប្រិយមួយ ទទួលបន្ទុកកែប្រែច្បាប់បោះឆ្នោត មុនពេលបោះឆ្នោតឆ្នាំ២០១៤ ខាងមុខនេះ។
គ្រប់តំណាងរាស្ត្រគណបក្សប្រជាធិបតេយ្យ ដែលជាបក្សប្រឆាំង បានលាលែងពីតំណែង។ ប៉ុន្តែ បក្សប្រឆាំងនៅមិនទាន់សំរេចថា តើខ្លួនអាចនឹងចូលរួមបោះឆ្នោត នៅខែកុម្ភៈខាងមុខដែររឺក៏យ៉ាងណា នៅឡើយទេ។ លោក ខន ចាទីកាវ៉ានី ដែលជាអតីតរដ្ឋមន្ត្រីហិរញ្ញវត្ថុថៃ បានប្រាប់រួចហើយថា លោកនឹងមិនឈរឈ្មោះជាបេក្ខជនក្នុងការបោះឆ្នោតខាងមុខនេះទេ។ ប្រសិនបើបក្សប្រជាធិបតេយ្យធ្វើពហិការមិនចូលរួមបោះឆ្នោត នោះការបោះឆ្នោតអាចនឹងមិនគ្រប់លក្ខណៈស្របតាមការកំណត់របស់ច្បាប់។ ដូច្នេះ វិបត្តិនយោបាយថៃអាចនៅបន្តរ៉ាំរ៉ៃដដែល។
ដោយឡែក បក្សភឿថៃរបស់លោកស្រីយីងឡាក់ ស៊ីណាវ៉ាត្រា ដែលជាប្អូនស្រីរបស់អតីតនាយករដ្ឋមន្ត្រីថាក់ស៊ីន ត្រូវបានគេរំពឹងថា អាចនឹងទទួលជោគជ័យក្នុងការបោះឆ្នោតនៅពេលខាងមុខ៕ដោយ ព្រំ សឿន សូលីណា (RFI)