ផ្ទុះហិង្សានៅរោងចក្រ APPLE កម្មករវាយនិងចាប់ចងជើងកាង២នាក់
ភ្នំពេញ៖ កាលពីព្រឹកថ្ងៃទី១៦ ខែធ្នូ កម្មករ កម្មការិនីរោងចក្រកាត់ដេរ APPLE ប្រមាណជាង៤ពាន់នាក់ ដែលបានធ្វើកូដកម្មអហិង្សា៣ថ្ងៃមកនោះ បានឈានដល់ប្រើហិង្សា វាយ និងចាប់បានកម្មករ២នាក់ដែលជាអ្នកបង្កហេតុ ដោយសារតែមានកម្មករ៦នាក់នៅក្នុងរោងចក្រប្រដាប់ដោយដំបង ហើយវាយលើកម្មករដែល កំពុងធ្វើកូដកម្មឲ្យមានរបួស ។
អំពើហិង្សា ខាងលើនេះកើតឡើងកាលពីវេលាម៉ោង១១ព្រឹកថ្ងៃទី១៦ធ្នូនេះ នៅមុខរោងចក្រកាត់ដេរAPPLE និង រោងចក្រកាត់ដេរBERY ដែលនៅជាប់គ្នា នៅផ្លូវគ្រួសក្រហម ភូមិជម្ពូវន្ត សង្កាត់ចោមចៅ ខណ្ឌពោធិ៍សែនជ័យ ដែលមានកម្មកររោងចក្រទាំងពីរសរុបជាង ៦ពាន់នាក់ បានធ្វើកូដកម្មរួមគ្នាតែម្តង។
ក្រុមការងារសហជីពបានព្យាយាមជួបចរចាជាមួយលោកថៅកែ ប៉ុន្តែដោយសារតែកូដកម្មផ្ទុះឡើងនៅនៅថ្ងៃសៅរ៍ និង ថ្ងៃអាទិត្យ ពុំមានមន្ត្រីខាងក្រសួងការងារមកដោះស្រាយ។ កូដកម្មបានអូសបន្លាយដល់ព្រឹកថ្ងៃចន្ទ ក៍កើតមានអំពើហិង្សា ។ ក្នុងករណីនេះសមត្ថកិច្ចកំពុងជួយធ្វើអន្តរាគមន៍ ដើម្បីបញ្ចៀសនូវអំពើហិង្សា៕ Cambodia News
